U19-futsal: Kalaallit Ukrainermiunut ajorsarujussuarput

Kroatiami futsalimi unammiuaarnermi 'Futsal Week'-imi Kalaallit Nunaat sinnerlugu unammisartut U19-it marlunngormat unammeqqaarput.

-imi unammeqqaarnermi kalaallit Ukrainermiunut 10-1-mik ajorsarput. Futsal Week

Kroatiap illoqarfiani Poreč-imi 'Futsal Week'-imi kalaallit futsalimi nunanut allanut unammisartui U19-it Ukrainemut marlunngormat unammineranni 10-1-mik ajorsarput.

Unamminermi kalaallit aallartinnerlupput, unamminermi sekundini qulini unammereersut 1-0-mik kinguarlutik. Ukrainermiut unamminerup immikkoortuiani siullermi arsaq paarineruaat, isertitsingajaqattaarlutillu.

Tungujortunik tujuuluarallit unamminermi minutsit 20-it siulliit naammassimmata 9-0-mik siuaqqapput.

Peqataalluarnerulersut

Unamminerup immikkoortuisa aappaanni kalaallit akiuunnerupput, isertitsinissamut periarfissaqaqattaarnerullutik.

Unamminerli naammassingajalersoq Ukraine quleraarlutik isertitsipput. Unammineq naammassingajalersoq kalaallit ataaseraartillugit isertitsipput, William Gantzhorn isertitsisuulluni.

Arsaatillaqqissunut unammisut

Nunanut allanut unammisartut sungiusaasuat John Eldevig unammereernerup kingorna Sermitsiaq.AG-imut ima oqarpoq:

- Ukrainemiut unammersuaarnerup aallartinnginnerani oqaloqatigaakka futsalimi qanoq inissisimanersut paasiniaaffigalugit. Ukrainep kangiata tungaani najugaqartuupput, sorsuttoqarneranut eqqugaavallaarnatik oqarput, unammisartuilu tamarmik peqataasinnaasut peqataatillugit.

Taakku European Powerhouse-tut ilisaritinneqarsimapput, tassa Europami futsalimi pikkorinnerpaat akornani Ukraine inissisimasoq ilisaritinneqarlutik.

Unamminerat sukkasooq

Unamminerup immikkoortuani siullermi minutsit tallimat iluanni kalaallit tallimariarlutik isertitsiffigineqarput.

- Taamaattumik unamminermi uteriarnissaq ajornakusoorpoq. Unammisartut sukkasuumik unamminertik sungiunniarsareqqaarpaat, immikkoortoq siulleq naammassimmat 9-0-imik kinguaqqalluta. Unillatsiarnermi kukkunerit ikilisinnissaat isumaqatigiissutigaarput, unamminerup sinnerani sukataassalluta aamma isumaqatigiissutigalugu, John Eldevig oqaluttuarpoq.

Unammisartut nersualaarneqartut

- Unamminerup immikkortuisa aappaanni unammisut naligiinnerupput, immikkoortumi tassani 1-1-erlutik, unamminermili 10-1-mik ajorsarlutik. Unamminerup aappaani kalaallit takutitaat isigissagaanni unammeqqinnissatsinnut isumalluarpunga. Ukrainermiut kalaallit nersualaarpai, naak 9-0-mik kinguaqqagaluarlutik suli sukataartut takusimasani nuannarisimallugu, oqarpoq.

- Unammisartut nunanut allanut unammeqqaarput, unammisartunut pikkorilluartunut unammillutik, taamaattumik assut takutitsilluarput. Ungarnimut unamminissaq naligiiffiunerussasoq naatsorsuutigaara, John Eldevig oqarpoq.

Ungarnimut unammissapput

Kalaallit Ungarnermiunut pingasunngornermi unammeqqissapput, unammineq nalunaaqutaq 14.45 Nunatta nalunaaqutaa malillugu aallartissalluni.

Sisamanngornermi puljekkaarnermi unamminermi kingullermi Japan unammissavaat, tallimanngorpallu ullormi eqqissisimaareerunik akunnerup naanerani 'Futsal Week'-imi inissinniunnerit unammissutigineqassallutik.

Unamminerit Futsal Week-ip Facebookiani isiginnaarneqarsinnaapput una toorlugu

U19 Futsalimi nunanut allanut unammisartut
Powered by Labrador CMS