Skip to main content

Tysklandimut unamminermi Asii unammeqataassaaq

Isikkamik arsaattartoq 15-nik ukiulik Asii Kleist Berthelsen Danmarkimi maanna najugaqartoq Sermitsiaq.AG-mit oqaloqatigineqarpoq. Inuussutissarsiutigalugu unammisartunngornissaq suli siunnertaraa

Danmarkip U16-mi unammisartui Tyslandimut Køgemi marlunngorpat unammissapput, tassani Asii Kleist Berthelsen danskit sinnerlugit unammeqataassaaq.

Arsaattarnini ineriartorteqqikkusullugu Danmarkimut ukioq kingulleq nuuppoq. Danmarkimi 18-it inorlugit ukiullit akornanni unammeqataasarpoq, tassani qulingiluariarluni unammeqataareernermi maanna aqqanilinnik isertitaqarpoq, isertitsinersaalluni. Klubbia Fortuna Hjørring aamma U18-ligami siuttutut inissisimapput.

- Tysklandimut unamminissatsinnut pissangavallaanngilanga. Unammeqataanissannut qilanaarpunga, taamaattoq tyskit pikkorissuupput, taamaattumik unammillugit nuannissaqaaq. Qaammatit tamaasa landsholdini ataatsimoortarpugut, unammisartoqatikka pulaffigilluarsimallugit misigaanga, Asii Kleist Berthelsen Sermitsiaq.AG-mut oqaluttuarpoq.

Danmarkimi periarfissarpassuit

Nuummit Danmarkimut nuunnissamik aalajangernini nuannaarutigaa.

- Taamatut aalajangernera uggorinngeqaara. Soorunami ilaquttakka kammalaatikkalu maqaasisarpakka, kisianni taanna aporfigineq ajorpara maani aamma nuannisarnermik. Arsaannerup tungaatigut periarfissarpassuaqarpoq maani aamma ikinngutitaartorluarnikooqaanga, arsaaffiup iluani siukkaasartoq oqaluttuarpoq. Taanna maanna 9. klassimi atuartuuvoq.

Angalanerpassuit

Dana Cup Academy Skotlandimut angalammat peqataavoq, tassani Celtic aamma Skotlandimi nunanut allanut unammisartunut unammipput ukioq manna.

- USA-mut sunngiusariassaagut februaarimi, aamma nunanut allanut unammisartunut toqqagaaqqissaguma Tuluit Nunaannut unammissaagut. Maanna U18-ni sungiusaqataasarpunga, ukioq kingullermit maanna sungiusarnerujussuuvugut, unamminnginnerni piareersarluartarluta, Asii Kleist Berthelsen oqarpoq.

Angerlassamaanngilaq

Inuussutissarsiutigalugu arsaattartuussagaanni qanoq inooriaaseqartoqassanersoq Danmarkimi najugaqarnermini paasineruaa. 

- Tassunga killinnissara suli ungasippoq, kisianni suli sungiusarusussuseqarluarpunga, ineriartorusuppunga aamma inuussutissarsiutigalugu unammisartunngorusuppunga.

Aappaagu 10. klassimi imaluunniit ilinniarnertuunngorniarfimmi atualissanerluni suli aalajanginngilaq.

- Kisianni maani Danmarkimiiginnassaanga, Asii Kleist Berthelsen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER