Inatsisartut qinersineq nunami maani naammassineqanngitsiartoq, Danmarkimi tv-kkut aallakaatitsisarfik TV2 IA-mi siulittaasoq Múte B. Egede pillugu saqqummiussaqarpoq.

TV2 naapertorlugu, partiimi siulittaasup aatsitassanut naalakkersuisuunermini sulianut marlunnut, inuttut aningaasaqarnerminut soqutigisaqarfimminut, attuumassuteqarpallaarnini oqaatigisimanngilaa.

Oqaluttuarineqartorli paasissutissat eqqortuunngitsut tunngavigalugit saqqummiunneqarsimavoq, oqaluttuarineqartoq TV2-p kinaassutsiminik isertuisumit pissarsiarisimavaa.

Ekstra Bladip paasissutissaatini naapertorlugit ulluni kingullerni saqqummiuppaa, aaqqissuisuuneq oqaluttuamik saqqummiussisoqarnissaanik sukataaruteqarsimasoq.

TV2-p tusagassiisarnermut pisortaata Ulla Posip Ekstra Bladimut uppernarsarsimavaa, aaqqissuisuuneq pineqartoq kukkussuteqarsimasoq. Ulla Porsip aamma oqaatigaa, oqaluttuamik kina saqqummiussisuusimanersoq ilisimallugu.

Ulla Porsilli kina pineqarnersoq oqaatigerusunngilaa:

- Tamanna oqaatigerusunngilara. Tusarfigisartakkavut oqaaseqarfigerusunngilakka, Ulla Pors Ekstrabladimut oqarsimavoq.

Taassuma erseqqissaatigaa, pisimasoq TV2-mut ajusaarnarluinnartuusoq.

Tusagassiisarnermut pisortap ilanngullugu oqaatigaa, aallakaatitsisarfik Kalaallit Nunaanni qinersisoqarneranut sunniiniarsimanngitsoq.