tusagassiuutit
TV-qarfiit Tele-Post isornartorsiorpaat
Tele-Post qanoq iliuuseqassanersoq tv-qarfinnit ernumagineqarpoq
- Suliffeqarfissup inuiaqatigiit pigisaata najukkani tv-qarfeeqqat, ilaasortanit pigineqartut ingerlanneqartullu, unammillissappatsigit tupinnarluinnarpoq akueriuminaallunilu.
Tv-qarfiit Nunatsinni Tusagassiuutilerisut Kattuffiat, NTK, isornartorsiuivoq.
Siulittaasup Claus Nielsenip tamanna politikkerinut oqariartuutigaa.
'Oqartussaaqataaneq eqqorneqassaaq'
- Tusagassiutitigut saqqummersumi atuarsinnaavarput, inuiaqatigiit suliffeqarfiutaat Tele Greenland nunatsinni internet aqqutigalugu tv-kut aallakaatitsisinnaanissaminnut periarfissanik misissuilersimasoq. Tamannami kikkut tamat oqartussaaqataanerannut eqquisinnaavoq, Claus Nielsen allappoq.
Namminersorlutik Oqartussanit suliffeqarfiutigineqartup namminersortunut unammillerniarnera NTK-p isornartorsiorpaa.
- NTK-miit naalakkersuisunut, inatsisartunullu ilaasortat, piginnittunut sinniisaagassi, kajumissaarusuppassi Tele Greenlandip najukkani tv-qarfinnut unammillerniarnera piaarnerpaamik unitsinniaqqullugu.
Innuttaasunut iluaqutaanavianngitsoq
Nangillunilu:
- Ukiorpaalussuarni tv-qarfinnik ingerlatsereerluta nalunngilarput Tele Greenlandip isertissinnaasai aningaasarpassuunngitsut. Taakku aningaasat, inuiaqatigiinnut annerusumik iluaqutaanavianngitsut pillugit, nunatsinni najukkani tv-qarfiit pigiinnarnissaat pingaartinneruniartigu.
- Taakkuami ulluinnarni inuiaqatigiinni oqallinnermut sunniutaat Tele Greenlandip iluanaarniarnerata, annerusumik inuiaqatigiinnut sunniuteqarnavianngitsup, mattuttariaqanngilaa.