Attaveqaatitigut ajornartorsiutit

TV-mut radiomullu attaveqaatit kipisaqattaarnerat

KNR-p DR-llu attaveqaatitigut kipisaqattaarput. Ajornartorsiut Tele-Postip aaqqiviginiarlugu sulissuteqarpoq

Nuna tamakkerlugu TV-mut radiomullu, tassunga ilanngullugit KNR1-imut, KNR2-mut, DR1-imut, DR2-mut, DR Ultramut KNR FM-imullu attaveqaatit piffissami kingullermi kipisaqattaartarput.

Tele-Post tusagassiuutinut nalunaarummi allapppoq.

Ajoqut piffissap ilaani takkuttarlunilu peeruttarpoq. Taamaattumik ajoqutaasup sumiinnerata nassaarinissaa unammillernartuusimavoq, sulilu taamaalluni.

- Suligasuartussanik Tele-Postimi pilersitsivugut, ajoqutaasup iluarsiniarsarinissaanik peqatigiillutik suliaqartussamik. Ajornartorsiut pilermalli attaveqaatit aalaakkaasunngorteqqinniarlugit iluarsiissutit assigiinngitsut suliarisimavagut, immikoortortami aqutsisoq Kim Hammond Zinck oqarpoq.

Ajoqutaasup iluarsineqarnissaanut tunngatillugu Tele-Posti KNR-imik oqaloqateqarpoq.

Powered by Labrador CMS