Gyserfilm
Tv-mik suliniummi kalaallit oqaluttuaat ersinartut ujartorneqarput
Kalaallit filmiortarfiutaat, Film.gl saamit filmioliortarfiutaat aamma York University Canadamiittoq suleqatigalugit, Issittumi qulliit orsutortuuneraniilli oqaluttuarineqartarsimasut aallaavigalugit ersinartulersaarummik, filmiliorput.
Suliniut atserneqarsimavoq Arctic Chills, qulinillu immikkoortulerlugu tv-kkut nangeqattaartussianngorneqassalluni. Filmilortartut Issittumeersut atorlugit immikkoortut immiunneqassapput.
Aningaasat workshop-imut
- Suliniut York University'p "Mobilizing Inuit Cultural Heritage"-miit aningaasaliiffigineqarsimavoq, aningaasat taakku, Issittumi filmiliortartut oqaluttuanillu oqaluttuartartut martsip qaammataani Kautokeinomi workshop-ertitsisoqalerpat Arctic Chills-imut isumassarsiornermut atorneqassapput, filmiliortartut peqatigiifiat tusagassiuutinut nalunaarummi paasissutissiivoq. Kautokeino Norgep avannarpasissortaaniippoq.
- Taamaammat kalaallit filmiliortartui, oqaluttualiortartui, isiginnaartitsisartut oqaluttuanillu oqaluttuartartut piumagunik kingusinnerpaamik 1. februar qinnuteqarsinnaapput. Angalanermut, nerisaqarnermut ineqarnermullu aningaasartuutit Arctic Chills-imit akilerneqassapput, tusagassiuutinut nalunaarummi allassimavoq.
Suleqatigiittareersimasut
Suliniut Arctic Filc Cirlce 2015-imi "The Last Walk" qulequtaralugu Issittumi naatsumik filmiliat pingasut saqqummersinneqarnerisa kingornat, Film.gl aappassaaneerluni saamit filmiortartuinik suleqateqarpoq. Filmit nunat tamalaat akornanni arlaleriarlutik takutinneqareersimapput aammalu Los Angeles aamma Yellowknife-mi nersorneqarsimallutik.
Arctic Film Circle-mi kalaallit ilanngussaat, Pipaluk K. Jørgensenimit aamma Mikisoq H. Lyngemit sananeqarpoq.
Norgep avannaani workshop-ertitsinissamut soqutiginnittut mailikkut nassitsivissaq info@film.gl atorlugu Film.gl attaveqarfigissavaat.