Katersuiniarneq
TV-kkut aningaasanik katersuiniartussat 20.000 koruuninnattut
Peqatigiiffik Kalaallit Meerartaat aningaasanik katersuiniarnissamut unnummut pisussamut aallartilluarput
Peqatigiiffik Kalaallit Meerartaat aningaasanik katersuiniassapput nalunaaqutaq 20.00-imit 23.00-ip tungaanut. Pisoq KNR-TV-kkut toqqaannartumik aallakaatinneqassaaq. Aallakaatitsinissaq sioqqullugu Royal Greenland 20.000 koruuninik tunissuteqarput.
- Royal Greenland 20.000 kr-nik tunissuteqarniarluni aalajangerpoq, peqatigiiffiup kalaallit meerartaannik ikiortarialinnik Kalaallit Nunaanni Danmarkimilu najugalinnut suliniuteqarnera tapersersorniarlugu. Meeqqanik inuusuttunillu suliniuteqarneq Royal Greenlandimit pingaartinneqarluinnarpoq, taamaammallu Foreningen Grønlandske Børnip nuna tamakkerlugu suliniuteqarnera tapersersorusunneqarpoq, Royal Greenlandimit nalunaarutigineqarpoq.
Suliffeqarfissuarmi naatsorsuuserisoq Camilla Emanuel aamma assartugalerinermi ilinniartoq Taatsi Olsen checkimik tunniussisussapput unnugu.
Royal Greenlandip pisortaanera Mikael Thinghuus Peqatigiiffik Kalaallit Meerartaanni aallartitatut ilaasortaavoq.