Tuusi, sorsunnersuup nalaaneersuunermiit eqqissinerup nalaanut

Politikeriusimasoq, IA-mut siulittaasuusimasoq, Naalakkersuisunut ilaasortaasimasoq, Inatsisartuni ilaasortaallunilu siulittaasuusimasoq Josef ’Tuusi’ Motzfeldt 80-iliivoq.

Sorsunnersuit aappaat Europami pileruttortoq Josef Motzfeldt 24. november 1941-mi Narsap kujatinnguani Igalikumi alianaaqisumi inunngorpoq. Kalaallit Nunaat nunarsuup sinneranit mattusimavoq, taamaattorli. Tassami Josefip inunngornerata nalerpiaani, Narsarsuarmi sakkutooqarfik, Bluie West One, illersornissakkut isumaqatigiissut 9. april 1941-meersoq aallaavigalugu sananeqarpoq.

Aviisi AG taama allappoq.

Josef savaatillup Peter Motzfeldtip nuliatalu Guulip ernerivaat, qatanngutigiillu, niviarsiaqqat marluusut nukappiaqqallu sisamaasut pingajorivaat. Tuusi, taamatummiuna inersimasumit aperineqarluni atini kutalluni taasimagaa, tassalu taaguutitaaralugu.

Narsarsuarmi sakkutooqarfimmut eqqaamiuusut

- 13-inik ulloqaannartunga Pearl Harbourimi amerikkarmiut sakkutooqarfiat japanimiunit piuneerutsinneqarpoq. Sisamat tungaannut ukioqalernissara tikillugu Kangiani, Europami, Afrikami, Atlantikumi Manerassuarmilu sorsuuttoqarpoq. Sorsunnersuaq qaangiummat ukiut tallimat qaangiuttut, arfineq-pingasunik ukioqartunga, Koreami sorsunnersaarsuaq ukiuni pingasuni ingerlasoq aallartippoq. Naak nunarput sorsunnerni toqqaannartumik akuunngikkaluartoq, Tunup Avannaarsuani akioriinneq eqqaassanngikkaanni, taava Narsarsuarmi sakkutooqarfik 1941-mi USA-mit pilersinneqartoq Igalikumiillu 20 km-eriinnarnik ungasitsigisumiittoq aqqutigalugu sorsunnerit malugisimavagut. Tassa sorsunnersuup nalaaneersuuvunga.

Sorsunnersuit aappaat majimi 1945-mi qaangiummat nukappiaqqap eqqaamasai siulliit aallartipput.

- Pingasunik ukioqartunga sunaaffa sorsunnersuup qaangiunnera inersimasortatta nalliuttorsiutigigaat ersarivimmik eqqaamasama siulliit ilagaat. Taamanikkut katersortafeqannginnatta nunaqqatigiit tamakkerluta isersimaffigisinnaasatuarput tassaavoq oqaluffipput. Meeqqat inersimasut niuisa akornini tupigusoqaagut inersimasorsuit oqaluffimmi sikaatuuttut isiginnaarlugit, taama mikitigalunga oqaluffik taama innimiilliorfissaanngitsoq ilisimareersimavara.

Aviisimi AG-mi Josef Tuusi Motzfeldtip ilisaritinnera tamakkerlugu atuarsinnaavat. Aviisi uani pissarsiariuk:

Powered by Labrador CMS