Tuusi Nunatta Eqqumiitsulianik Saqqummersitsivissaa pillugu: Inuussutissarsiortut tapiissuteqarsinnaagaluarput
Kunngikkormiut koruunit millionip affaanik tapiissuteqarnerisigut nunatta eqqumiitsulianik saqqummersitsivissaanut siulersuisut suliniutip ukiorpassuarni suliarineqarsimasup piviusunngortinneqarnissaanut isumalluarput.
Kisianni sanaartornissamut 200 millioner koruunit pissarsiariniarnissaat suliassarujussuusoq siulittaasup Josef Motzfeldtip akuersaarpaa, Kalaallit Nunaannilu inuussutissarsiortunit namminersortunit tunisiumalluartoqarnissaa aamma neriuutiginerarlugu, aviisimut AG-imut oqarpoq.
- Nunatta eqqumiitsulianik saqqummersitsivissaanik sulissuteqarnitta ingerlatiinnarnissaanut kunngikkormiunit tapiissutit assersuutaasutut isumaqartilluinnarpavut, siulersuisut siulittaasuat, Josef Motzfeldt, nunatta eqqumiitsulianik saqqummersitsiveqalernissaanut aningaasaateqarfiup siulersuisuisunut siuttuusoq, oqarpoq.
Taassuma erseqqissaatigaa, siulersuisut ukiorpassuarni suliniummut, sanaartugassap 200 millioner koruuninik akeqarnissaanik missingersuuteqarfiusumut, Kalaallit Nunaanni pisortat inuussutissarsiortullu namminersortut aningaasassarsiornermi ikiuunnissaat kissaatigisorujussuugaat.
Kalaallit Nunaanni inuussutissarsiortunit namminersortunit amerlasuut aallartissutissanik tapiissuteqarsinnaasuuppata tamanna ajunngilluinnartumik oqariartuutaassagaluartoq, siulersuisut siulittaasuat isumaqarpoq:
- Taamaalillutik nunani allani anigaasaateqarfiit takusinnaalissagaluarpaat, Namminersorlutik Oqartussat, kommuni namminersortullu, tassa Kalaallit Nunaanni inuiaqatigiit tamarmiusut, suliniummut tunuliaqutaasut, Josef Motzfeldt AG-mut nassuiaavoq.
Suliniummut kunngikkormiut tapiissuteqarnerata pingaarutilimmik assersuutaagaluartoq, taamaattoq koruunit millionip affai 200 millioner koruuninik aningaasassarsiornermi annikitsuinnarmik alloriarnerupput.
Oqaluttuaq tamaat uani AG-imi atuaruk: