Tuukkap Tasiilami 2024-mi suliffissuaq piareersinnaavaa
Aalisarnermik suliaqartut marluk Tunumi saarullittassiissutinik hunnorujut millionit koruuninik arlalinnik nalilinnik pissarsisinnaapput. Ingerlatseqatigiiffik nutaaq Tunumi imaluunniit Kujataani tunitsivissanut periarfissanik nutaanik ineriartortitsinissaa, Naalakkersuisut piumasaqaataasa ilagaat. Taamaattumik Royal Greenland suleqatissatut piukkunnartuusoq, Carl Christensen isumaqarpoq.
Saarullittassiissutinut nutaanut 200 millionit koruunit sinnerlugit nalilinnik pisassinneqarniaraanni,
atajuartussamik suliffeqarfimmut pilersaarut, kilisaat kalaallinit pigineqartoq aamma Tunumi imaluunniit Kujataani tunitsivik suliffeqarfissuaq piumasaqaataapput. Naalakkersuisut suliaqartunut marlunnut nutaanut ammaassipput, taakku siorna pisassiissutinik qinnuteqarsimanerat tunngavigalugu pisassiissutit pissarsiariniarsarissavaat.
Royal Greenland ingerlatseqatigiiffiit taakku marluk aappaannut Tuukkamut piginneqataalersimasoq, Sermitsiaq.AG-p qanittukkut oqaluttuaraa, pisassiissutinik nutaanik pisassinneqarsinnaasut Carl Christensen piginnittuisa ilagaat.
Tamanna pillugu ilaatigut Demokraatit siulittaasuat Jens-Frederik Nielsen arlaleriarluni apeqquteqarpoq. Biologit siunnersuinerannut tunngatillugu piujuartitsinerunngimmat, amerlanerusunik pisassiissuteqartoqarniarnera taassuma paasisinnaanngilaa.
Suliaqartunut nutaanut sooq pisassiisoqassanersoq aamma paaserusuppaa, taakkulu ingerlatseqatigiiffiit suliaqartut nutaajunngitsut isumaqarpoq, tassami ingerlatseqatigiiffinni piginnittut arlallit aalisarnermik ingerlatsereermata – ilaallu Tunumi saarullinniartuullutik.
Suliatik ilisimagaat
Royal Greenland sooq piginneqataalersinneqarsimanersoq pillugu Carl Christensen Sermitsiaq.AG-mut nassuiaavoq.
- Royal Greenlandip peqataatinneqarnissaa pitsaanerpaasoraarput, taakkumi Tasiilami suliffeqarfissualiornissamut tamakkiisumik pilersaaruteqareerput. Suliffeqarfik 2024-imi kvartalimi siullermi piariissaaq.
Kujataani imaluunniit Tunumi tunitsivissanut pioreersunik nutaanilluunniit periarfissanik ineriartortitsinissaq, pisassiissutinik nutaanik pissarsinissamut piumasaqatit ilagaat.
- Suliffeqarfik 30 millionit koruuninik akeqassaaq, taamaattumik aningaasaliineq annikinngilaq, kisianni illuanik eqqarsaatigilluagaavoq, pilersaarusiorluagaavoq aamma Tasiilap talittarfiani inissisimalluarpoq, tassanilu nunaminertamik atuinissamut akuersissut aamma sanaartornermut pilersaarutit naammassereerput.
Royal Greenland ullumikkut nunatsinni sumiiffinni arlalinni aalisakkanik suliffissuarnik arlalinnik ingerlataqarpoq, taakkulu immikkut ilisimasaat Tasiilami suliffissuarmi nutaami iluaqutaasinnaavoq, Carl Christensen oqarpoq.
- Royal Greenland suleqatitut suliffeqarfimmut pilersaarusiornerup saniatigut sulisunik eqqortunik nassaarnissamut, ukioq tamakkerlugu tunisassiornissamut qulakkeerinnittussanik isumaginnissinnaavoq. Royal Greenland illoqarfinni aamma nunatsinni isorliunerusuni nunami tunisassiornermik asseqarani misilittagaqarnersaavoq.
Pisassiissutit amigartoorutaasinnaasut
Carl Christensenip suliffeqarfimmut nutaamut aningaasaliissutit 60 procentii akilerniarpai, Royal Greenlandillu 40 procentii akilissallugit. Tunumi inissisimanissaa tassunga pingaaruteqarpoq, Kujataa arlalinnik tunitsiveqareernera pissutigalugu.
- Suliffeqarfik Tasiilami suliffissatigut iluaqutaassaaq, illoqarfimmi taakku amigaataalluinnarput. Suliffinnik nutaanik pilersitsiinnarani aamma amerlanerusut aalisartunngorsinnaanerannik kinguneqassaaq, tamatumalu peqatigisaanik piniartutut inuussutissarsiorsinnaallutik.
Carl Christensenip nunami tunitsivik ukiuni arlalinni akilersinnaanavianngitsoq nassuerutigaa, annertuumik tunisassiorsinnaassuseqartussaanini pissutigalugu, kisianni Tasiilami eqqaanilu aalisarnerup annertussusaa killeqartupilussuuvoq. Tamannali saarullittassiissutinik nutaanik pitsanngoriartinneqarpoq, taakku 200 millionit koruuninik isertitaqarfiusinnaapput.
Dorhn Bankemi pisassiissutit
Suliaqartup aappaa Norsaq ApS Uummannami aalisartunit arlalinnit aamma Kim Høegh-Damimit pigineqarpoq. Taannalu Sermitsiaq.AG-p paasissutissaatai naapertorlugit siunertamut kilisaammik pisinissamik oqaloqatiginnissimavoq.
Pisassiissutinit nutaanit amerlanerit Dorhn Bankemiittut, Carl Christensen oqarpoq, taakku Tunumi Kujataanilu pisassiissutinut akulerunneqassanngillat, taakku immikkut biologinit siunnersuiffigineqarmata.
- Islandimiut ukiumut 200.000 tonsit sinnerlugit saarullinnik aalisartarput, saarulliit taakku ilaatigut Kalaallit Nunaanneerput. Taamaattumik Islandimiut aalisarnerannut tunngatillugu maannamut 8 procentinit annertunerunissaannut, Dorhn Bankemi aalisarnerup akuerinissaanut aporfiunngilaq, Island peqatigalugu aalisagaqatigiiaat pineqarnerannik isigineqartariaqarmat.