nuna ikuallattoq
Tuttut najugaat ikuallattup navianartorsiortikkaa
Nunami ikuallanneq siaruaatissappat tuttut neriniartarfiat ukiuni qulikkuutaani peerussinnaavoq
Nassuuttumi nunap ikuallannera siaruaatissappat tuttut neriniartarfiat pingaaruteqarluinnartoq kalluarsinnaavaa. Pinngortitaleriffimmi tuttunut umimmannillu immikkut ilisimasalik Christine Cuyler naliliivoq.
- Qeriauaannartumi masarluup ikuallannera tuttunut annertuumik kingunerlutitserujussuarsinnaavoq. Issittumilu naasut naaqqinnissaat ukiut qulikkuutaat ingerlanerini aatsaat pisinnaaoq, Christine Cuyler Sermitsiaq.AG-mut oqarpoq.
Siaruaatissappat ajornartorsiutaassasoq
Pinngortitalerffik piffimmi tuttoqassutsumik naatsorsuikuunngitsoq taamaammaallu tuttut amerlassussaat ilisimaneqanngitsut, taassuma naqissuserpaa. Piffillu piniartunit soqutigineqangaatsiartuuvoq, taamaammallu tuttut amerlasoorujussuusinnaallutik.
Ikuallanneq 15 kvadratkilometerinik annertussuseqarnissaa, upalungaarsimanermik suliallit kingullermik naliliipput. Ukiunilu kingullerni aatsaat taama annertutigisumik nunami ikuallattoqaraluartoq, tuttoqassutsimut aarlerinartorsiortitsinavianngitsoq, Christine Cuylerip nalilerpaa.
- 15 kvadratkilometerit pineqartoq piffimmi annikippoq, ikuallannerli kimmut siaruaatilissangaluarpat qeqertap annersaa aatsaa kalluarneqassaaq tamannalu ulorianarluinnartuusinnaavoq.
Uteqqinnavianngitsut
Tuttut ikuallannermit toqqaannartumik aarlerinartorsiortinneqanngitsut ilisimatooq naliliivoq. Taakku qularnanngilluinnartumik qimaareersimassapput.
- Tuttut nallorissorujussuupput taamaammallu nunavimmut ikaarsinnaalluarlutik, taanna oqarpoq.
Tuttulli piffimmi ikuallassimasumut qanillattornavianngillat.
- Qeriuaannartup masarsuanik ikuallattoornernik misilittangaqarpugu, ilaatigut Nunavumi aamma North West Territoriesimi, tassanilu tuttut neriffigisartakkatik pingaarutillit uterfigineq ajoraat takusimavarput, Christine Cuyler oqarpoq.
- Alianarpoq, piniartulli ernumassuteqarmata paasisinnaalluarpakka, taanna oqarpoq.
AAMMA ATUAKKIT:
- Eqqaamasinnaasanni ikuallanneq annertunerpaaq
Nassuttuup eqqaani ikuallattoqarpoq
Assit takukkit: Piniartarfimmi nuna ikuallattoq