Tuttut amerlanerusut pisarineqartalissapput

Sumiiffiit ilaanni tuttut tallimariaammik amerlanerulersimapput, tamannalu nammanneqarsinnaanngilaq. Pinngortitaleriffimmit aamaammat inassutigineqarpoq tuttut ikilisarneqassasut.

Amerlanerit tuttoqarluarnera iluarussagunarpaat, piniarluartoqarniassammat, Pinngortitaleriffimilli inassutigineqarpoq naasoqassuseq illersorniarlugu tuttullu amerlassusaat aaqqiiffiginiarlugit, kvadratkilometerimut amerlanerpaanik 1.2-nik tuttoqartassasoq.

Tuttut amerlavallaaraangat naasoqassuseq ajoquserneqartarpoq, taamaalillutimmi nerisassakinnerulersaramik, tamatumalu malitsigisaanik piaqqiorpallaarunnaartarlutik, taamalu naggaterpiaatigut tuttut ikinnerulernerannik kinguneqassalluni.

Maannakkorpiaq aqutsiveqarfik 3-mi (Akia-Maniitsoq) aamma aqutsiveqarfik 4-mi (Ameralik) tuttut tallimariaammik amerlanerulersimapput, taamaammat Pinngoritaleriffiup tusarniaanermut 2019-imeersumut akissummini inassutigaa, tuttut ikilisarneqassasut.

Aqutsiveqarfik 3-mi tuttut kvadratmeterisumut 5,2-usartyt nalilerneqarput, aqutsiveqarfik 4-milu kvadratmeterimut 5,1-usartut nalilerneqarluni.

2019-imi piffissat piniariarfiusimasut ukioq manna atuutiinnarneqassasut inassutigineqarpoq.

Aqutsiveqarfinni 2, 3, 4 aamma 5-imi, tassaasut Kangerlussuaq, Sisimiut, Akia-Maniitsoq, Ameralik Qeqertarsuatsiaallu, piffissat piniariarfiusussat.

Inuussutissarsiutigalugu piniartut 1. augustimiit 31. decemberimut. (2018 1. august - 15. oktober).

Sunngiffimi piniartut 1. augustiit 31. oktoberimut. (2018 1. august - 30. september).

Piffissaq piniarfiusartoq sivisunerusoq

Tuttut amerlassusaat allanngorartuaannarsimapput. Piffissat ilaanni tuttut amerlavallaaraqangamik nerisassaaruttarsimapput, taamalu tamangajammik perlerlutik toqusarsimallutik. Naasut nerisartagaasa naaqqinnissaannut ukiorpassuit ingerlasinnaasarput.

Namminersorlutik Oqartussat inuussutissarsiutigalugu sunngiffimmilu piniartut siorna piniariarfissaat sivitsorsimavaat, Tuttullut Umimmaallut 2020-mi aasakkut ukiakkullu piniarneqarnissaat pillugu ukioq manna tusarniaanermi taamatut sivitsueqqittoqarniarpasippoq. Tusarniaaneq tallimanngormat naammssineqarpoq.

Aamma aqutsiveqarfik 2-mi (Kangerlussuaq-Sisimiut) tuttoqarpallaarpoq. Tuttut kvadratkilometerimut 2,7-inik amerlassusilerneqarput, tassani aamma ajornartorsiulertoqarsinnaavoq, siunnersuinermi oqartoqarpoq.

Pisanik nalunaaruteqartussaaneq sukateriffigineqartoq

Aalisarnermut, Piniarnermut Nunalerinermullu Naalakkersuisoqarfimmit qanittukkut nalunaarutigineqarpoq, tuttunniarnissamut akuersissuteqartarneq tuttunniarnermillu nakkutilliisarneq sukateriffigineqassasut. Akuersissut pisarisimasanik nalunaarutitalik utertinneqanngippat, ukiup tulliani akuersissummik pissarsisoqarsinnaassanngilaq.

Tamatumunnga pissutaavoq, akuersissutit tunniunneqarsimasut utertinneqanngikkaagata qanoq pisaqartoqarsimatigineranik naliliiniarnerup ajornartarnera. Taamalu sumiiffiit ilaanni qanoq tuttoqartiginersoq naliliiffigiuminaassisarluni.

Sumiiffiit taakku ilaat nalunaaruteqarfiunnginnerpaasut ilagisimavaat, aqutsiveqarfik Nuuk. 2019-imi inuussutissarsiutigalugu sunngiffimmilu piniartunut akuersissutit 3.152-it tunniunneqarsimapput, akuersissutilli 442-innaat pisaqarsimanermik nalunaarutitalerlugit utertinneqarsimallutik.

Powered by Labrador CMS