Tussiarfissuaq pillugu pisoq: Aki aamma Aaja taasinianngillat – Naalakkersuisut utaqqimaarput
Kalaallit Folketingimut ilaasortat Danmarkimi tussiarfissuup atorunnaarsinneqarnissaa pillugu taasinianngillat. Kalaallit Nunaanni tussiarfissuaq aamma atorunnaarsinneqassanersoq Naalakkersuisut suli isumminngillat.
Danmarkimi naalakkersuisunngortut SVM-meersut Illersornissaqarfimmut aningaasanik amerlanerusunik atuiniarlutik tussiarfissuup atorunnaarsitsiniarnerminnut isornartorsiorneqarput. Naalakkersuisut ilaatigut peqatigiiffippassuarnit, ilagiinnit aamma Folketingimi partiit sinnerinit isornartorsiorneqarput.
Sisamanngornermi Folketingimi oqallittoqarnerani ilaasortat atlantikup avannaaneersut suliamut ilanngunneqarput, tassani nalliuttup atorunnaarsinneqarnissaa Kalaallit Nunaanni Savalimmiuniluunniit atuuttussaanngitsup atorunnaarsinneqarnissaa atlantikup avannaanit ilaasortanit aalajangiiffigineqarsinnaanera naleqqunnersoq, Liberal Alliancemeersup Ole Birk Olesenip paaserusuppaa.
Kalaallilli ilaasortat akisussaaqataannginnerarput, danskit tamakkiisumik akisussaasuunerannut innersuussillutik taasiniarnatik oqaatigaat. Ilaasortat atlantikup avannaaneersut taasitinnagit SVM naalakkersuisut 89-inik ilaasortaatitaqarput – atlantikullu avannaanit ilaasortat taasissanngikkaluarpata aamma amerlanerussuteqarlutik.
Taamaakkaluartoq Aki-Matilda Høegh-Dam (S) aamma Aaja Chemnitz (IA), pisariaqalissappat taasinissamut ammapput, assersuutigalugu Danmarkimi naalakkersuisut annanneqartariaqalissappata.
Aki-Matilda Høegh-Dam (S) tusagassiisartuni aqqutigalugu Sermitsiaq.AG-mut ilisimatitsissuteqarpoq:
Akulerunnianngitsut
- Aap, taasinianngilanga. Atlantikup avannaanit ilaasortat pissutaat assigalugu. Taasinissatsinnut suna pisariaqalersitsisinnaanersoq naluara. Taamaattoqartillugu isummertussaavugut. Kisianni maanna taamaattoqanngilaq, Aki-Matilda Høegh-Dam suliaq pillugu taama oqarpoq.
Aaja Chemnitz (IA) assingusumik nalunaaruteqarpoq:
- Tussiarfissuup nunarput sunniuteqarfiginngilaa, taamaammat akulerunnianngilagut, politikeri Sermitsiaq.AG-mut oqarpoq. Danmarkimi naalakkersuisunut partiimit tapersersuisuulluni oqaatigaa, maannakkorpiarli naalakkersuisut suliami ikinnerussuteqalernissaat eqqarsaataannarmiippoq.
Apeqqut: Atorunnaarsinneqarneratigut Illersornissaqarfimmut aningasanik saniatigut qulakkeerinninnissaanik, tassuunalu Kalaallit Nunaannut iluaqutaasussamik, Mette Frederiksenip oqaaseqarneranut tunngatillugu politikkikkut qanoq isumaqarfigaajuk. Kalaallit Nunaata nalliuttumik atorunnaarsitsinissaa naleqqussorinngiliuk?
- Taamaassappat uagut Folketingimi aalajangernagu Inatsisartut aalajangigassarissavaat, Aaja Chemnitz oqarpoq.
Naalakkersuisut oqallinneq malinnaaffigaat
Nalliuttup atorunnaarsinneqarsinnaanera itigartitsissutigeriinngilaat.
Ilinniartitaanermut, kultureqarnermut, timersornermut ilageeqarnermullu naalakkersuisoq, Peter P. Olsen (IA) allagaqarluni ilisimatitsissuteqarpoq:
- Kalaallit Nunaata Danmark assigalugu tussiarfissuarmik nalliuttumik atorunnaarsitsissanersoq Naalakkersuisut suli isumminngillat.
- Tussiarfissuup Danmarkimi nalliuttutut atorunnaarsitsinissaa pillugu Naalakkersuisut oqallinnermut malinnaapput, Peter P. Olsen akissuteqarpoq.
Tussiarfissuup Danmarkimi nalliuttutut atorunnaarsitsinissaa Kalaallit Nunaanni ilageeqarnermut sunniuteqarnavianngitsoq taassuma oqaatigaa.