Tusilartut ussersuutaat atorlugit oqalutsit ikippallaarnerat killiliisoq
Kalaallit Nunaanni tusilartut ussersuutaat atorlugit allagartaqarlutik oqalutsiusinnaasut marluinnaapput, tamatumalu Naalakkersuisut tusagassiortunik katersortitsinerni tusilartut ussersuutaat atorlugit oqalutseqartitserusuttuarnerat killeqartippaa.
Naalakkersuisut assersuutigalugu coronamut atatillugu tusagassiortunik katersortitsinermi tusilartut ussersuutaat atorlugit oqalutseqartarnissaq atortarusukkaluarpaat, tusilartut tutsarluttullu malinnaasinnaaniassammata.
Kalaallit Nunaanni tusilartut ussersuutaat atorlugit allagartaqarlutik oqalutsiusinnaasut marluinnaanerat tusagassiutinik katersortitsinerni tusilartut ussersuutaat atorlugit oqalutseqartitsinissamut killiliivoq. Aamma kalaallisut tusilartut ussersuuteqannginnerat, taamaallaat ussersuutit ataasiakkaat eqqaassanngikkaanni, killileeqataavoq. Nunatsinni tusilartut ussersuutaat atorlugit atuisut danskit tusilartut ussersuutaat atortarpaat.
Meeqqanut, Inuusuttunut Ilaqutariinnullu Naalakkersuisoq Paneeraq Olsen (N) inatsisartuni ilaasortamut Pipaluk Lynge-Rasmussenimut (IA) allakkatigut akissuteqarluni taamatut ilisimatitsissuteqarpoq.
Naalakkersuisup ilisimatitsissutigaa, tusagassiortunik katersortitsinermi ataatsimi Peqqinnissamut Naalakkersuisoqarfiup, avataanit oqalutsip suleqatigineratigut, tusilartut ussersuutaat atorlugit oqalutseqarneq atorsimagaa. Oqalutseqarneq Kalaallit Tusilartut Kaftuffiata facebookkikkut quppersagaani toqqaannartumik aallakaatinneqarsimavoq.
Oqalutseqarusuttartut qanoq amerlatiginerat nalileruminaattoq
Kalaallit Nunaanni Innarluutillit Kattuffiata, NIIK, ukioq manna siusinnerusukkut ujartorsimavaa, Naalakkersuisut tusagassiortunik katersortitsinerminni tutsarluttut eqqarsaatigalugit tusilartut ussersuutaat atorlugit oqalutseqartalernissaat.
Pipaluk Lynge-Rasmussenip aamma apeqqutigisimavaa, inuit qassit tusilartutut oqaluuttariaanersut kisitsisaatigineqarnersoq. Naalakkersuisut tassunga atatillugu 2020-mi misissuisoqarsimanera innersuussutigaat, misissuisimanerup takutissimavaa, inuit 34-t tusaasinnaanerminnik annaasaqarnermik nappaateqartutut paasineqarsimasut, amerlanerunissaalli ilimagineqarsinnaasoq, kisitsit taanna paasissutissanit pitsaasunit tunngaveqanngimmat. Tilioq ilisimatitsivoq, Peqatigiiffiup Kalaallit Tusilartut Kattuffiata (KTK-p) tusilartut tutsarluttulluunniit 21-t attaveqarfigisarai.
Naalakkersuisut erseqqissaassutigaat, inunnut innarluutilinnut inuiaqatigiit tikikkuminarnerusut ilanngutsitsinerusullu, inunnut innarluutilinnut suliassaqarfimmi Naalakkersuisut anguniagarigaat.