Tusassip kukkunini nassuerutigaa helikopterimillu aallartitsilluni
Savaatillit oqarasuaatitigut internettikkullu qaammatini arlalinni attaveeruttarnertik pillugu Tusassimiit iluamik ikiorserneqarnikuunatik, maanna Tusassip ajornartorsiortit aaqqiiffiginiarlugit helikopterimik savaatilinnut ullumi angalatitsipput.
Oqarasuaatit internetillu attaveerukulasarnerat kujataani savaatilinnut ulluinnarsiutaalersimavoq. Savaatillit avinngarusimasumiipput sukkasuumillu napparsimaveqarfimmut apississinnaanngillat arlaanik ilungersunartumik pisoqassagaluarpat.
Savaatillit attaveqaataat pillugit Sermitsiaq.AG Tusassimut attaveqareersorlu Tusass kukkusimanerminut nassuerpoq, pingasunngornerullu ullaavani helikopterimik Tusass savaatilinnukartitsivoq.
Sara Lundgaard Jensen attaveerutikulasumiippoq, taannalu ullaaq manna oqarasuaatiminiit sianeqqissinnaanngorluni oqaluttuarpoq.
- Kiisami attavineqqippugut ullut 21-inngoreersullu. Kisianni Tusass siullermeerluni maaniinngilaq. Ukiup ingerlanerani marloriarluni maaniittareerpoq. Neriuutigiinnassavarput attaveeruteqqiaasanata, savaatilik oqilisimaarpaluttoq, kisianni suli pakatseqqasoq taama oqarpoq.
Tusass utoqqatserpoq
EBL atorlugu attavillit, tassa avinngarusimasuni inissisimasut attaveqaataani attavillit tallimat qulillu akornanniittut sivisuumik oqarasuaataat attaveqarsimanngitsut, Tusassip Sermitsiaq.AG-imut paasissutissiissutigaa.
- Naammaginanngilluinnarpoq, Tusassimiillu erseqqissaatigissavarput kukkussuterput ilutsinni ilinniuteqarfigigatsigu. Pisisartugut maanna attavigineqaleruttorput nassuiaaffigineqassapput aaqqiivigineqassallutillu, Tusass ilaatigut taama Sermitsiaq.AG-imut akissuteqarpoq.
Savaatillit arlallit marlunngornermi ualikkut pingasunngornikkullu Tusassimiit attavigineqarsimallutik Sermitsiaq.AG-imut uppernarsarpaat.
Ilumut Tusass savaatilinnut attaveqarsimanersoq paasiniarlugu Sermitsiaq.AG savaatilinnut attaveqarniartarsimagaluarpoq. Savaatillilli pingasunngornerup ullaavani attavigineqarsinnaasimanngillat oqarasuaataat internettiallu attaveqanngimmata.
Modem silarlu ajoqutaasimasinnaasut
Tusassip maanna savaateqarfinni modemit taarsersuleruttorpai, suliffeqarfiummi ajornartorsiut tassaniisasoq ilimagilluinnarpaa.
- Tusassip teknikeriisa maanna modem-it nutaat piareersaleruttorpaat. Modeminik nutaanik pisariaqartitsisut helikopterimik aqqut sukkanerpaaq atorlugu tikinneqarumaarput, Tusass ilaatigut Sermitsiaq.AG-imut akissuteqarnermini allappoq. Helikoptererlu maanna savaateqarfinnut ingerlaaleruttorpoq.
Modemit ajoquteqarsinnaanerisa saniatigut attaveqaatit silamit sunnerneqarsinnaasut Tusassip tikkuartorpaa
- Attaveqaatit allanngorartuutillugit sila ilaatigut ajornartorsiutaasinnaavoq. EBL-imi attavillit satellit-ikkut attaveqarnerat pissutaalluni sila attavilutitsisarsinnaavoq, Tusass akissuteqarnermini naqissusiivoq.
- Taassuma saniatigut innersuutigeqqissavarput pisisartugut namminneerlutik atortut iluarsiniartannginnissaanik akiligassallu piffissaq eqqorlugu akilertarnissaanik. Driftinfo-lu misissulaartarnissaa atortullu ajoqquteqarnerani atuisunik sullissisut attavigisarnissaat innersuussutigaarput, taama Tusass naggasiilluni allappoq.