Tusassimik atuisut Nunani Avannarlerniitillutik nunatsinni akit atorlugit sianersinnaapput
Maanna Tele-Postimi Tusass-inik anginerpaanik atuisut nunani avannarlerniitillutik Kalaallit Nunaanni akit assingimalitassallu atorneqartut atorlugit atuisinnaalerput
1. juni 2018 roamingernermi sulississut nutaaq Tusass-ip
saqqummiutissavaa, taannalu taaguuteqarpoq Tusass nunani allani.
Tusass nunani allani atorlugu, Kalaallit Nunaanni akit assingi
malitassallu atorneqartut atorlugit, mobilit datamut, sms-ernermut
aammalu nunanut avannarlernut taakkunanngaanniillu sianernernut
atorsinnaavat.
- Tusass nunani allani atorlugu sullitatta attaveqaateqarnermi
nioqqutinik pitsaanerusunik akikinnerusunillu neqeroorfiginerat
ingerlateqqipparput, Tele-Postimi pisortaaneq
Kristian Reinert Davidsen tusagassiuutinut nalunaarummi oqarpoq.
Atuisuuffinnut tamanut atuutinngitsoq
Roamingernermilu sulississummi nutaami Tusass-imik atuisuuffiit tamarmik atuutinngillat. Tamanna taamaallaat Tusass mobilimik atuisuuffinnut qaammammut 499 koruuniilinnut tassanngaluunniit akisunerusunut atuuppoq.
- Sooq qaammammut mobilimik atuisuuffinnut 499 koruunilinniit taamaallaat atuutissava?
- Roamingerfiusinnaalertussani aningaasartuutissat nunani allani sullissisunut, neqerooruteqartuusunut ingerlatseqatigiiffinnullu Tele-Post naleqqussaasariaqarmat, pisortaaneq Kristian Reinert Davidsen oqarpoq.
6.000 koruuningajaat sipaakkit
Roamingimut sulississummi nutaami qanoq sipaarutiginnittoqarsinnaanera apeqqut pillugu akissutigineqarpoq:
- Danmarkimiinneq assersuutigineqarsinnaavoq. Danmarkimiitilluni roamingimut akit naliginnaasut atorlugit 6 GB atorneqarpat 5.700 koruuninik akeqassangaluarpoq.
Roamingernermi sulississummi nutaami maanna qaammammut 500 koruunit missarluinnaani akiliutigineqartassapput, tassa Kalaallit Nunaanni akigitinneqartut nunani avannarlerni aamma atuutissapput.
Nunat akornanni killeqarfinnik atorunnaarsitsisoq
- Roamingimik sullississutitta nutaap nunat akornanni killeqarfiit
atorunnaarsippai, taamaalillutik sullitagut nunani allani angalareerlutik angerlarunik akiligassanit akisoorsuarnit tupaallatsinneqassanngillat, Kristian Reinert Davidsen oqarpoq.
Taanna paasissutissiivoq, piffissap ingerlanerani nunat allat aamma Tusass nunani allani ilanngunneqarumaartut.
Kalaallit Nunaata saniatigut nunat avannarliit tassaapput: Danmark,
Finland, Savalimmiut, Island, Norge, Sverige aamma Åland.