Tusassimi aalajangiineq: Inuiaqatigiit ineriartornerat pillugu ilisimasanik annaasaqarfiusoq
Kalaallit Nunaanni nalunaarasuartaateqarnikkut ingerlatseqatigiiffik nuna tamakkerlugu nakerisarsiortuunngitsumik innuttaasunik misissuinermut oqarasuaatit normuinik ikiuuttarunnaarpoq. Tamanna Ilisimatusarfimmi ilisimatusartunit ernumanartinneqarpoq. Kisianni Tusass naapertorlugu tamanna paasissutissanik illersuinissaq pillugu malittarisassanik malinnissinnaanissamut pisariaqarpoq.
- Iluamik isigalugu suliassanut tunngassuteqaannarpoq. Kisianni maannakkorpiaq uannut aporfiliisorujussuuvoq.
Taama adjunkt Najaaraq Demant-Poort, Ilisimatusarfimmi ph.d.-iinngorniummik innuttaasut pisortani sullissivinnut tatiginninnerannik misissuinermik imaqartumik, suliaqartoq, oqarpoq.
Aviisi AG taama allappoq.
Taassuma takorloorsimagaluarpaa apeqqut ilaatigut nuna tamakkerlugu oqarasuaatikkut apersuilluni isumasiuineq HS Analysemit suliarineqartoq aqqutigalugu qulaajarsinnaassallugu, tassani oqarasuaatikkut apersuisartut Kalaallit Nunaat tamakkerlugu inunnut nalaatsornerinnakkut toqqartorneqartunut sianeqattaarsinnaassagaluarmata.
Taamaakkaluartorli HS Analyse periarfissaqannginnerartariaqalersimavoq.
Nalilersuinermik suliffeqarfik Kalaallit Nunaannik aallaaveqartutuaq, innuttaasunik isumasiuinernik, imaluunniit tuluttut »surveys«-inik, ukiorpassuanngortunik suliaqartarsimasoq, paasissutissanik pisariaqartunik soorlu Tusassimik atuisuni oqarasuaatit normuinik najukkanillu, pissarsisinnaajunnaarsimavoq. Tamanna Tusassip HS Analysemut nalunaarutigisimavaa tamatumunngalu tunngavilersuutigisimallugu, tamanna inuit pillugit paasissutissanut inatsimmut aamma GDPRimik inatsimmut, EU-mi paasissutissanik illersuinissamik peqqussutaasumut, naapertuutinngitsoq.
HS Analysemik piginnittup, Henrik Skydsbjergip, AG-mut uppernarsarpaa, suliffeqarfiutini nuna tamakkerlugu innuttaasunik, amerlassutsimik tunngaveqartunik, misissuinernik ingerlataqarsinnaajunnaarsimasoq. Tamatuma kingunerisaanik sullitat soorlu ilisimatusarnermik ingerlatsiviit, naalagaaffimmi kattuffiit, NGO-t tusagassiuutillu siunissami innuttaasunik misissuinernut imaluunniit nakerisarsiunngitsumik uppernassuseqarluartunillu isumasiuinernut annertuunut paasissutissanik kissaatigineqartunik allatut iliorlutik aallertariaqalerput.
Aviisimi AG-mi atuarnerusinnaavutit. Aviisi uani pissarsiariuk: