Tusarniummut akissut: Nuup mittarfittaassaa kukkusumik inissinneqarsimavoq
Mittarfiup tallilerneqarnissaanut tunngatillugu immikkut ASN-imik tusarniaatitsinermi akissuteqartut sisamat isornartorsiuipput.
Knud Seblon Nuummeersoq oqaaserpassuit atunngikkaluarlugit mittarfimmut nutaamut suliaq pillugu ASN-imik nalunaarusiortoqarnerani tusarniaatitsinermut isornartorsiuteqarsinnaavoq.
Inissianut qanippallaartoq
- Maanna inissisimaffigineqartoq inissianut qanippallaarpoq, nutaamillu mittarfittaarnissamut tunngatillugu illoqarfiup avataanut inissiinissaq inissaminiinnerugaluarpoq, Knud Seblon naatsukullammik akissuteqarpoq.
Kommuneqarfik Sermersooq Qinngorput kangerluttaani nipit akornutaanissaat pujoralaallu mingutsitsilernissaat ernumassutigalugu tusarniummut akissuteqartunut ilaavoq. Taakku saniatigut mittarfittaassap illoqarfiup pingaarnerup ilisarnaatissaatut takujuminarsarlugu suliaqartoqarsimannginnera, borgmester Asii Chemnitz Narupip ernummatigaa.
Illunik titartaasartoq Peter Barfoed ukiuni arlalinni ilungersuuteqarluni paasititsiniaasarsimavoq mittarfissaq qeqertami Angusunnguani inissikkaanni pitsaanerussagaluartoq.
Isikkorissaaneq
- ASN-imut nalunaarusiaq isikkorissaanertuinnaq nalilersinnaavara, Peter Barfoed mittarfissap inissisimanera pillugu arlalitsigut isornartorsiuilinnginnerminni aallaqqaasiuteqarpoq.
Qaqqanik mittarfiup inissinnissaanut atungassanik qaartiterinermi Quassussuaq ilanngarterneqarujussuarnissaanik taanna aarleqquteqarpoq. ASN-imilu nalunaarusiami mittarfiup sanaartorneqareernerani qaqqap qanoq isikkoqarnissaanik assilialiamik innuttaasut takusinnaasaannik nalunaarusiamut ikkussisoqarnissaa, taassuma ujartorpaa.
Sillimaniarneq pillugu takissusiusussaq
Peter Barfoedip paasisinnaannginnerarpaa mittarfissap 2.200 miiterisut takissuseqartussaap isuini taamaallaat 150 miiterisut takitigisunik sillimaniarneq pillugu ilassuteqartinneqarnissaa, nunanimi allani 300 miiterisut takitigisunik sillimaniarneq pillugu ilassuteqarnissaq innersuussutaasaraluarmat.
- Taakku 300 miiterit EU-mit nunallu EØS-imi ilaasunit inatsimmut piumasaqaatitut ilanngunneqarsimapput. Tamanna aamma atuuppoq Norgemi Islandimilu. USA-mi aamma Canadami atuutsinneqarpoq. Kalaallit Nunaanniunngitsoq, nunatsinnimi inatsisit nutaanngilinikut atorlugit mittarfinnik ullutsinnut naleqqukkunnaarsimasunik sanaartorput, Peter Barfoed inerniliivoq, taassuma tikkuarpaa mittarfiit isumikkut illuttut 300 miiterisut takissuseqartunik sillimaniarneq pillugu ilaneqarnissaat pisariaqartoq, isuimi naappallaamik ilaneqarsimagaangasa timmisartut mittarfimmiit sisoortoortarmata.
Pujoralaat
Qaqqamik qaartiterinerup kingunerisaanik pujoralaat sisorartartut aqqutaannut akornutaalissasut, tamatumalu kingunerisaanik sisorartarfik atorsinnaajunnaavissasoq, illunik titartaasartoq aamma isumaqarpoq.
Taassuma aamma ernummatigaa timmisartorsuit orsussaata mingutsitsinerat isaannarmit takuneqarsinnaanngitsut anorimit Cirkussømut, illoqarfiup imeqarfianut, tinginneqartalissasut.
Nipit pujoralaallu akornutaalernissaat, Thomas Andorip, mittarfiup qanittuani najugaqartup aamma ernummatigai. Mittarfik isikkivigineqalerpat inissiat naligi appassasut, taanna isumaqarpoq. Taamaammat inissiaatillit taarsiiffigineqarnissaannut maleruagassaqalernissaa, taassuma piumasaraa.
