Tusarniaassummi siunnersuut: Akeqanngitsumik biileqartitaanermut akileraarut qaffanneqassaaq
Sulisitsisumit akeqanngitsumik biileqartitaaneq akisunerulissaat, Naalakkersuisut tusarniaassummi siunnersuutaanni tamanna atuarneqarsinnaavoq.
Aningaasaqarnermut Naalakkersuisoqarfimmit naatsorsuutigineqarpoq, akeqanngitsumik biileqartitaanermut sakkortunerusumik akileraarusersuinikkut Nunatta Karsia ukimut 2,5 millioner koruuninik iluanaaruteqartassasoq.
- Akeqanngitsumik biileqartitaasarnerup sakkortunerusumik akileraarusersugaalernissaa inuussutissarsiuteqarnermut aningaasaqarnikkut allaffissornikkullu sunniuteqartussaassanngilaq, akileraarusiineq akileraartartumi iluaqutissamik pissarsisuusumi pisussaammat. Akileraarusiinerulli sukannernerulersinneqarnerata suliffeqarfiit sulisumik akissarsiaannik annertunerusumik akileraarusiinermut taarsiissutitut qaffaanissaannut tatisimanninnerup sakkortunerulersitsisinnaanera pinngitsuuittussatut oqaatigineqarsinnaanngilaq, Aningaasaqarnermut Naalakkersuisoqarfik oqaaseqaateqarluni allappoq.
Biileerniartartut kaaviiaartitaannut sunniuteqarsinnaasoq
-Tamatumalu saniatigut aamma biilit akeqanngitsumik atugassiissutigineqartut ikiliallalaarnissaat ilimagisariaqarpoq, tamannalu biileerniarfiit kaaviiaartitaqarnerannik annikitsumik appaallatsitsissalluni. Tunngavissanik maanna pigineqartut tunngavigalugit tamatuma qanoq annertutiginissaa eqqoriarneqarsinnaanngilaq, Naalakkersuisoqarfik allappoq.
Ullumikkut akeqanngitsumik biileqartitaaneq pingasunik assigiinngitsunik akileraaruserneqartarpoq. Apeqqutaalluni illoqarfimmi pineqartumi aqquserngit, biilip atorneqarfii qanoq kvadratmeterimut annertuginersut.
Aqquserngit biilit atorneqarfii 75.000 kvadratmeterit angullugit annertussuseqarpata akeqanngitsumik biileqartitaanermut akitsuutit 60.000 koruuniniit 70.000 koruuninut qaffanneqassapput.
Biilip atorneqarfiisa annertussuseqarnera 25.000 kvadratmeterit aammalu 75.000 kvadratmeterit akornanniippat, akeqanngitsumik biileqartitaanermut akitsuutit 30.000 koruuniniit 35.000 koruuninut qaffanneqassapput.
Kiisalu biilit atorneqarfii 25.000 kvadratmeterit inorpatikkit, akitsuutit 15.000 koruuniniit 17.500 koruuninut qaffanneqassapput.
Nuummi innuttaasoq suliffeqarfimminit akeqanngitsumik biileqartitaasoq taamaalilluni, 42 procentimik akileraartartoq ukiumut immikkut 4.200 koruuninik akiliuteqartarssaaq, tassa siunnersuut Inatsisartuni akuerineqassappat.
2010-mi kingullermik allanngortinneqartoq
Tusarniaanermi siunnersuutigineqartumi erseqqissaassutigineqarpoq, akeqanngitsumik biileqartitaanermut akileraarut kingullermik 2009-mi novembarip qaammataani allanngortinneqarsimasut.
- Akeqanngitsumik biileqartitaanerup akileraartarnermi nalingata qaffanneqarnissaa siunnersuutigineqarpoq akinut akissarsianullu nalinginnaasumik qaffakkiartorneri 1. januar 2010-mit atuutilersumik kingullermit allanngortinneqarmalli piffissami tassani qaffakkiartornerit malillugit.
Ilanngullugu eseqqissaatigineqarpoq, ”siunnersuut siunertaqarpoq akeqanngitsumik biileqartitaanerup nalinginnaasumik akissarsianik aningaasarsiat akileraarusersugaanerannut qaninnerusumik akileraaruserneqarnissaannut naapertuuttumik”.
Akileraarusersuinerit nutaat ulloq 1. januar 2023 atuutilissasut pilersaarutaavoq.