Tusarniaanerup sivisussusaa borgmesterip atortiinnarpaa
Hans Egedemut eqqaassutissap inissisimanera pillugu inuttaasunik tusarniaaneq sapaatip akunnernik pingasunik sivisussuseqaannassaaq.
Innuttaasunik tusarniaaneq sapaatit akunnernik pingasunik sivisussuseqartinnagu qaammatinut pingasunut Siumut Nuummit sivitsorneqarumavoq. Hans Egedemmi eqqaassutissaata inissisimanera pillugu innuttaasut isummernissaminnut piffissaqarluarlutik periarfissinneqartariaqarput.
Kommuneqarfik Sermersuumili borgmester Charlotte Ludvigsenip (IA) tusarniaanerup sivitsorneqarnissaa itigartippaa:
- Naagga, tusarniaaneq sapaatit akunnernik pingasunik sivisussuseqartiinnassavarput. Oqallinneq maanna aallartereerpoq, eqqaassutissarlu pillugu oqallinnerup kissalaarnerani innuttaasut isummernerat paaserusupparput, Sermitsiaq.AG-mut oqarpoq.
Borgmesterip ilanngullugu nassuiaatigaa kommunalbestyrelsep aningaasaqarnermut inuussutissarsiornermullu ataatsimiititaliaa juunip 25-ani ataatsimiimmat ilisimatissimallugu eqqaaniut tusarniutigineqalersoq.
Innuttaasut peqataatinneqarnerat siulliunneqassaaq
Eqqaassutissarli Nuup immikkoortuani nutaannginnermi inissisimaannaratarsinnaavoq. Allaaserisap allanneqarnerani innuttaasunut tusarniaanermi taasisimasut malillugit, innuttaasut 403-t eqqaassutissaq inianiitiinnarusuppaat, 284-illu eqqaassutissaq allamut nuukkusullugu.
Nittartakkakkulli taasisitsineq tusarniummi kisimiinngilaq. Innuttaasummi nittartakkatigut taasinissamut periarfissaqanngitsut allakkatigut taasisinnaatitaapput.
Borgmesterip ilanngullugu erseqqissarpaa utoqqaat namminneq angerlarsimaffimminni ikiortillit aamma utoqqaat illuanni najugaqartut taasinissamut sulisunit ikiorneqassasut, isumaat kommunimut apuunneqarnissaat anguniarlugu. Kommuneqarfik Sermersuullu Hans Egedemut eqqaassutissaq pillugu meeqqat titartagaat piumavai, meeqqat isumaat aamma peqataatinneqassammata.
- Tusarniaaneq siulliupparput eqqaassutissaq pillugu innuttaasut isumaat tusarusukkatsigu. Amerlanerussuteqarluartut kissaatigippassuk eqqaassutissaq peerneqassasoq, taava tassanngaanniit aalajangertoqarumaarpoq, Charlotte Ludvigsen oqarpoq.
- Suliami uani amerlanerussuteqarluarneq qanoq paasissavarput?
- Taasinermi 50/50-imik qanippallaartumik inissinneq atorsinnaanavianngilarput. Amerlanerussuteqarluarnerli tassaasinnaavoq 75 procentii, Charlotte Ludvigsen akivoq.
Naggataani politikerit
Tusarniaaneq arlalinnik immikkoortortaqarpoq. Innuttaasut amerlanerussuteqarluartut eqqaassutissaq peerusuppassuk, eqqaassutissaq sumut inissinneqassanersoq pillugu taasititsisoqarumaarpoq. Tamanna augustimi pisussatut pilersaarutigineqarpoq.
Siumut Nuummit isornartorsiutit ilagaat politikerit misigisimasut borgmesteri suliami kisermaassilluni suliaqartoq.
Charlotte Ludvigsenili erseqqissaavoq kommunalbestyrelsemi ilaasortat septemberimi peqataatinneqarumaartut. Tassa innuttaasut isumaat pillugu tusarniaaneq naammassereerpat.
Tusarniaaneq juulip 21-ata tungaanut ingerlanneqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...