Tusarniaanermut akissutit isertuunneqartut
Namminersorlutik Oqartussat tusarniaanermut akissutit neriorsuutigineqartutut nittartakkamut ikkussimanngilaat. Allagaatinik takunnikkumaneq itigartinneqarsimavoq.
Naalakkersuisut siunnersuutinut tusarniaassutigisimasaminnut akissutit tamanut saqqummiunnissaannut assut tunuarsimaarput.
Tusarniaassutigineqartunut nittartakkami ammasumik paasiuminartumillu saqqummiussisoqartarnissaa neriorsuutaasimagaluarpoq.
- Tusarniaassutigineqartut takusinnaavatit, illuatungeriillu tusarniaavigineqartut akissutaat paasisaqarfigisinnaallugit, nittartakkami oqaaseqatigiit siulliit taamatut allassimapput.
Siunnersuutit ukiuni kingullerni tusarniaassutigineqarsimasut misissuataaraanni, akissutigineqartarsimasut nassaassaaneq ajorput. Inatsilli suliarineqaleraangat aatsaat askissutigineqarsimasut nalinginnaasumik saqqummiunneqartarput.
Allagaatinik takunnikkumaneq itigartinneqartoq
Ikiaroornartut pillugi Inatsisartut inatsisissaattut siunnersuummut akissutigineqarsimasut Sermitsiaq.AG-mit takorusunneqarsimagaluarput. Tamannali aqqutigalugu innuttaasut paasitinneqarsinnaasimanngillat, partiit assigiinngitsut siunnersuummut qanoq isumaqarnerannik, allagaatinimmi takunnikkusunneq itigartinneqarsimavoq.
- Inatsisissatut siunnersuut tusarniaanermut atatillugu akissutigineqarsimasut ilinnut takutinneqannginneranni Inatsisartunut saqqummiuteqqaarneqartussaapput, allagaatinik takunnikkusussimanermut Peqqissutsimut Naalakkersuisoqarfimmit akissutigineqarsimasoq taamaut nipeqarpoq.
- Pisortat ingerlatsinerat pillugu inatsimmi § 2, imm. 1 naapertorlugu inatsisit pillugu suliat, inatsisissatut siunnersuut Inatsisartunut saqqummiunneqarsimappat taamaallaat inatsimmut attuumatinneqartarput.
- Inatsisissamut nassuiaatini allassimavoq, aalajangersakkami erseqqissaatigineqarsimasoq, inatsimmut tunngatillugit suliani allagaatit, siunnersuut Inatsisartunut saqqummiunneqarsimappat taamaalaat takutinneqarsinnaasut.