Skip to main content

Tusarniaaneq siulleq eqqissisimasumik ingerlanneqarpoq

Naak Kuannersuit pillugit suliniut pillugu politikerit peqataannginnerat isornartorsiorneqaraluartoq, tusarniaaneq innuttaasunit, Namminersorlutik Oqartussani atorfilittanit Greenland Mineralsimiillu naammagisimaarneqarpoq. Naliliinerat naapertorlugu apeqqutigineqartut akineqarluartarput.

Narsarsuaq 120-it missaannik innuttaasoqartumi Kuannersuit pillugit suliniummut tusarniaanermi siullermi innuttaasut 40-t missaat peqataapput tallimanngormat unnukkut. Corona pillugu killilersuinerit pissutaallutik inimi tusarniaanermi ingerlanneqartumi innuttaasut tamarmik tusarnaariarsinnaannginnerat tusarnaarianit uggorineqarpoq.

Inuit arfineq-pingasut qulillu akornaniittut inersuarmut isersinnaannginnertik pissutigalugu inimit allamit tusarnaarput.

AFIS-operatørit pingasut tusarnaartunut ilaapput. Greenland Mineralsip, Namminersorlutik Oqartussat aamma Center for Miljø og Energi-mit ilisimatuumut saqqumeereermata saqqummiunneqartut naammagineqanngillat.

- Narsami siunissami najugaqarusukkama qanoq oqarnersut tusaarusukkaluarpara. Suliniut pillugu ataatara eqqartueqatigisarpara, taanna suliniut pillugu atuartorujussuusarpoq. Saqqummiunneqartut nutaartaqanngillat, tamaasami siornatigut tusareerpakka, 25-nik ukiulik Narsameersoq, Ineqi Sakariassen, oqarpoq. 
Ineqi Sakariassen
Jensine Berthelsen

Paasissutissanik nutaanik amigaateqartoq

Aatsitassarsiorneq ammassappat inuiaqatigiinnut sunniutissai paasisaqarfiginiarlugit tusarniaanermut malinnaajartorpoq.

- Paasissutissat sukumiinerusut paaserusukkaluarpakka. Suliamut tunngatillugu nalunaarusiami nalornissutigineqartut amerlavallaartut isumaqarpunga.

23-nik ukiulik Ole Hjorth tusarnaariartunut ilaavoq, taassuma nalunaarusiat teknikkimut tunngassuteqanngitsut atuareerlugit paasisaqarnerorusulluni tusarniaanermut malinnaaqataavoq.

- Suliniut pillugu apeqqutissaqaalukkaluarpunga, inimulli tusarniaanermut ingerlanneqartumut isersinnaanngilanga aperiartorlunga, pakatseqqalaarluni oqarpoq.

Unikkallarnermi aamma paaserusutaraluani akissutissarsinngilai.

- Ilikkagaqarsimasutut imaluunniit paasisaqarsimasutut misiginngilanga - saqqummiunneqartummi nalunaarusiani atuareerpakka, oqarpoq.

Innuttaasut ernumassutaat

Tusarniaanermi unikkallartoqareersoq innuttaasut apeqquteqarnissaannut periarfissinneqarput. Nunatta nakorsaaneranut, Greenland Mineralsip pisortaaneranut, DCE-mi ilisimatuumut aamma aatsitassarsiornermut Naalakkersuisoqarfimmi pisortamut apeqquteqartoqarsinnaalluni.

Nalunaarusiamit saqqummiunneqareersut aamma ilisimasat naapertorlugit apeqquteqartut suliniut pillugu apeqquteqarput.

Pujoralaat radioaktivitallit siaruarsinnaanerat, Tasiup sipusoorsinnaanera, savaatilinnut innuttaasunullu sunniutissat pillugit apeqquteqartoqarpoq. Kiisalu Greenland Minerals aningaasatigut ajalusuussagaluarpat  ilumut eqqortumik qimanneqassanersoq apeqqutigineqarpoq. 

Ole Hjorth
Jensine Berthelsen
Pujoralaat radioaktivitallit sumut siaruarsinnaanerat nassuiaanneqarpoq, maleruaqqusaasut qaangerlugit killigititaq qaangerneqassanngitsoq naqissuserneqarpoq.

Tatsip Taseq, Greenland Minerals Energyp aatsitassanik piiaanermini eqqagassaataanik toqqortaasivissap sipusoorsinnaanera ilimanaateqanngitsoq naqissuserneqarpoq, tassami meterinik arfineq pingasunit qulinut sialleraluarpalluunnit angitigissaaq, kuulernissaa ilimanaateqarnani. 

Ole Hjorth tusarniaanermi apeqquteqarnissamut periarfissinneqarpoq, tusarniaaneq naammassimmat akissutigineqartut naammagisimaarpai. 

- Paasisaqarnerulaarpunga. Suliffeqarfissuaq akiliisinnaajunnaassappat qanoq iliortoqassanersoq paasisaqarfiginerulaarpara. Suliniutip aallartinnginnerani suliffeqarfissuaq saliinissamut aningaasanik illikartitsissasoq paasivara, tamanna tusarlugu eqqissiallannarpoq, oqarpoq.

Ole Hjorthip tusarniaanerup sivitsorneqarnera iluarisimaarpaa, politikerit apeqquteqarfiginissai qilanaaraa.

Aallartinnera iluarisimaarneqarpoq

Greenland Mineralsip pisortaanerata tusarniaanerup aallartinnera iluarisimaaraa.

- Innuttaasut qanimut oqaloqatigisinnaanerisa aallartinneqarnerat kiisami aallartippoq, tassuuna suliniutip aallartinnera iluarisimaarpara, Sermitsiaq.AG-mut oqarpoq.

Tusarniaanermi apeqqutigineqartut erseqqissuusut oqarpoq.

- Suliniut pillugu malinnaalluartoqarnera malugaara, apeqqutitsialannik apeqquteqaqattaartoqarpoq, oqarpoq.

Suliniummut akerliusut 'Uraani Naamik' tusarniaanerup aallartinnera iluarisimaarneqarpoq. Taamaattoq apeqqutigineqartut ilaannut suli sukumiinerusumik akisoqartalernissaa neriuutigineqarpoq.

Qaqortumi ataasinngorpat tusarniaasoqassaaq, Narsami tusarniaaneq pissalluni. Sila pissutigalugu Qassiarsummi Igalikumilu tusarniaanissaraluit taamaatinneqarput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER