Skip to main content

Tusarnaartitsineq kingulleq: Neriunneq pilluarnerlu attupillallugit

Ukioq nuannersumik naggataarneqarpoq Kulturip Illorsuani Nanook aamma For Akia nipilersortoralugit ukioq manna kingullerpaamik marlunngornermi tusarnaartitsisoqarmat. Tusarnaartitsinermit allaaserisaq atuaruk

Kulturip Illorsuani Nanook aamma For Akia nipilersortoralugit ukioq manna kingullerpaamik marlunngornermi tusarnaartitsisoqarpoq.

Katuap paarlersuani isiginnaartitsivissuaq qaqiffigisallugu tamanit pilerigineqartartoq annoraaminerujussuarmik qaqortumik avatangerneqarsimavoq qullersuarnillu qaqquaarinnik qinngornilinnik seqersitsivigineqarsimalluni. Nannunit tamanit nanuunerusut kisimik utaqqineqarput, tassalu nipilersoqatigiit nuannarineqarluartut misileraallutillu nipilersortartut Nanook.

Avanersuarmiu qilaatersortartoq qaqortumik annoraalik nannullu amiinik qarlilik kamilillu isiginnaartitsivissuarmut qaqivoq. Sequngeriarluni qilaatini katuarusaalerpaa. Tiguartiivilluni niperujuulerpoq erinarsorlunilu ‘nannumik qitornaqarneq’. Erinarsuut taanna qangarsuarnisaavoq, Inughuit kinguaariiaat arlallit kingornutaraat allaallu 1900-p aallartinnerani immiussaasimasut pigineqarput. Inuppassuit tiguartisimallutik tupigusullutillu angut nakkuppaat.

Nipilersukkat qamuuna attuisussaapput
Tusaasat qanna attoraangassuk aak sukkasoorsuarmik ingerlalersarpoq, kiaguttoqalertarpoq qulliillu nakkaalersarlutik. Aapparisimasanut misigissuserisimasatit qaffakaalersarput ullullu nuannersut pisimasullu eqqaallugit qungujummik nassataqartarput. Misigissuseq takkuttoq tulleq tassaavoq qanoq iliuuseqarsinnaajunnaarneq nukillalaarnerlu, aappariinnerup angusaqarfiunngitsoortup isertortumik qulalersikkaluaraatit misigissutsit nutaat pinngussapput, tassalu asannileqqinnermut imaluunnit inuunermut nutaamut neriunneq nuannaarnerlu. Nipilersukkat qamunnga attuisut taama misigititsisarput.

Neriuuteqarneq attupillallugu
Nipilersoqatigiit nuannarineqarluartut indiemik nipilersortartut Nanook nammineqqissaaq isumassarsiorlutik ingerlaaseqarput. Nipilersornerup silarsuaani nipinik assigiinngitsunik misileraasartuupput, taallat isumatsannermik imallit neriuummillu nassatallit tusaamasaassutigaat. Tusarnaartitsissagaangamik isiginnaartitsivik immikkut isumalersorlugulu aaqqissuuttarpaat. Tusarnaartitsinermi nalaani tupaallatsitsinissamik isumassarsiullaqqissuupput, soorlu pulaartoqartarlutik, tamannalu aamma Ukioq Manna Tusarnaartitsinermi Kingullermi ippassaq unnukkut pisumi aamma pivoq. 

Cd-t 15.000-it tunisimavaat. Taamaakkaluartoq tusarnaartitsinissaannut isertussat ikippallaassanersut apeqquserneqarsimagaluarpoq, pingaartumik tusarnaartitsinissaq marlunngornerinnarmi ukiutoqarlu aqaguttoq ullulerneqarsimanera eqqarsaatigalugit. Nipilersoqatigiilli tusarnaartitsivissaminnut qaqimmata allaanngilaq suna tamarmi inissaminut inissittoq. Nipilersukkat misigissutsinut tunngasuupput misigisassallu tamakkiisumik malugerusukkaanni nipilersortut isigalugillu tusarnaagassaapput. Tassa taanna pillugu inuit tusarnaariartarput - tillerneq misigiumallugu – nipilersukkat uummataat misigiumallugu.

Assit takukkit: Neriunneq pilluarnerlu tusarnaartitsinermi attupillallugit

Atuaruk: Ukioq manna Katuami tusarnaartitsinermi kingullermi marluk tusarnaartitsissapput

Per Berthelsen pulaartoralugu
‘Timmissat taartut sumut minniarpisi’ erinarsortup aappaa Christian K. Elsner erinarsorpoq. Nipilersoqatigisartakkani kisiisa ingiallortiginngilai aammali tusarnaarianut unnuup ingerlanerani tupaallannartut nuannernersaata ingiallorpaa, tassalu nipilersoqatigiinni tumerparpaartooqqaartup Martin Zinckip. Uummatip tillernera malillugu tumerparpaarmat allaanngilaq aliasuutit qularnerillu tamarmik sumut tamaanga tinginneqartut. 

Tusarnaartitsinerup nalaani appileriallaraat ‘Inuit Nunaat’, erinniortua taalliortualu tupaallatsitsilluni qaqeriataarmat tulliikka nutsukkamilliuku. Per Berthelsen SUME-kkunneersoq guitarilerluni qaqivoq. Erinnamik ingiallueqataasut allat tassaapput nipilersortartoq Malik Hegelund Olsen aamma unnuup ingerlanerani kissassaasut For Akia-kkut erinarsortuat Hans Mortensen. Tusarnaariat tamarmik nuannaarnerup pilluarnerullu pianik pissittaarlutillu erinarsoqataanerat puigugassanngilaq.
-Ukioq manna tusarnaartitsinerit nuannernersaat, arnaq inuusuttunnguaq 20-kkunnik ukioqarpasittoq nuannaarluni oqarpoq.

‘Kisimiinneq’ nipilersuusiaavoq misigissutsinik tamanik attuisoq nikerartumillu sukkasusiligaalluni, Nanook-ikkut atortagaannit tamanit taanna nuannarinerpaasaraara. Erinarsortuata aappaata Frederik K. Elsnerip taalliaralugulu erinniaraa tamatumuunalu Nina Kreutzmann Jørgensen matumani erinarsoqatigaa. Arnaq taanna nunatsinni arnani erinaginnerpaat ilagaat uagullu tusarnaariat peqqaannagu nuannisartivissorpaatigut!

Soorunami kikkut tamamik Nanook-ikkut nuannarisinnaanngilat, nipilersoqatigiit tamarmik aamma taamaapput. Ippassarli takkuttut eqqarsaatigalugit nuannaarneq naammagisimaarinninnerlu annertooq misigineqarput. Nipilerinerup qullilerinerullu tungaatigut ataasiakkaannguanik kukkutaartoqartaraluartoq Katuami aaqqissuisut ippassaq unnuk iluatsilluartutut nalilerpaat. Nipilersortartut erinarsortartullu allat appeqataasut tassaapput Jenseeraq Olsen aamma Kimmernaq Kjeldsen. Tusarnaariat 600-t missaanniipput, siornamut naleqqiullugit amerlanerulaartu

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER