Tusarfik kinaanerminik isertuussisoq: Suliffeqarfik Tarraq isumaqatigiissummik malinninngilaq
Suliffeqarfiup Tarrap kiffartuussinissamik isumaqatigissuteqarnikkut Nuummi angerlarsimaffeqanngitsut ornittagaannik isumaginnittuusimasup suleqatigiunnaarnerata malitsigisaanik Kommuneqarfik Sermersooq ukiap ukiullu ullui taartut nillertullu takkutsinnagit ulapittussanngorpoq.
Pasitsannarpoq suliumatooq allanngueqataarusussuseqarluartorlu Storm Ludvigsen kiffartuussinissamik isumaqatigiissutigineqartup malinneqarnissaanut tunngatillugu pissutsit ajunngitsumik ingerlanneqarsoralugit tatiginnipallaarsimasinnaasoq, aviisi Sermitsiaq allappoq.
Tassami Nuummi angerlarsimaffeqanngitsut sullinneqarnerat pillugu Sermitsiamit samminninnitsinni Storm Ludvigsen-ip oqaloqatigisarnerani inuttaata arlaleriarluni ersersittarpaa nammineq allaffissortuunani, taamaammallu suliffeqarfimmi allaffissornikkut suliassaatai allanut isumagitittarini, aamma Kommuneqarfik Sermersuup qaammatini akiliiffiusussaasuni qaammat naatinnagu akiliisannginneranik nammineerluni Sermitsamut takussutissamik tunniussinikuugaluarluni.
Sulisuminik piffissaq eqqorlugu akissarsisitsinaveertarnini pillugu naggatissaa tikillugu Storm eqqortuusorisani najoqqutaralugu tamaviaarpoq. Paasiuminaatsikkamiuk suleqatigiinnerliorneq aamma isumaqalersimavoq parteerisimasani Inuit Ataqatigiit ilaasortaaffigiunnaaramiuk tununneqarsimalluni. Tusaajumaneqanngitsut misigisimasimavoq, pingaartumik kommunip tungaanit kiffartuussinissamik isumaqatigiissut malikkumaneqanngitsutut nalilikkani pillugu borgmesterimik naapeqatiginnikkusukkaluarnini kinguneqarneq ajormata.
Maannali aviisi Sermitsiamit allagaammik tunineqarnikuuvugut kinaassutsiminik isertuussisumit, aaqqissuisoqarfimmiilli ilisimasatsinnit.
Allagaammi tassani atuarneqarsinnaavoq suliffeqarfik Tarraq assut suleqatigiuminaassimasoq aammalu kommunip tapiissutai aningaasat qanoq atorneqartarnersut pillugit uppernarsaatinik pissarsiniaruminaaffigineqarsimasoq.
Allaaserisaq tamakkerlugu aviisimi Sermitsiami atuarsinnaavat: