Tusagassiortut: Politikerit nuimanerusut tusagassiortut ingalassimaniartarpaat

Qinikkat qulliunerusut, pingaartumik naalakkersuisunut ilaasortat, apersorniarlugit isumaqatigiissuteqarfiginiartarnerat ajornarsigaluttuinnarpoq.

Tusagassiortut eqimattat, Tusagassiuinermi sulisut peqatigiiffiannit, TP-mit aaqqissuunneqartumik naapereernerminni, oqallisissiaq ima qulequtserneqarsimasoq 'Tusagassiortut politikerillu' pillugu taama naliliipput.

- Politikerit akisussaasut aamma tusagassiortut imminnut ungasilligaluttuinnartutut ipput. Tamanna uggornarpoq, tassami pissutsit taamaaliartorneranni eqqorneqartut tassaammata innuttaasut, nunatsinni politikikkut ingerlatsinerup tunuliaqutaanik sukumiisumik paasitinneqarnissaminnut periarfissaat taamaalillutik annikinnerulertarmata, naapereernermit oqaaseqaammi allassimavoq.

Allanik apeqquteqarnissaq pinngitsoortarpoq

Oqallinnermi erserpoq politikerinik, pingaartumik naalakkersuisunut ilaasortanik, apersuinissamut isumaqateqarniartarneq ajornarsigaluttuinnalersimasoq. Ileqqunngoraluttuinnarpoq naalakkersuisup attaveqarfiginiakkap allattaata atorfilittaataluunniit akissuteqartartutut inissisimaleraluttuinnarnerat, taakku qinikkap aamma tusagassiortup akornanni akunnermiliuttutut inissisimaleraluttuinnarnerat malunnarsiartorluni. Akuttunngitsumik tusagassiortup apeqqutigerusutai e-mailikkut nassiunneqarnissaat piumasarineqartarpoq, amerlanertigullu allatsi atorfililluunniit akisarluni, imaluunniit tusagassiutinut nalunaarutigineqarsimasut innersuunneqartarlutik.

- Tamanna tusagassiortutut sulinermi uggornartorujussuuvoq, tassami politikerimik akisussaasumik toqqaannartumik oqaloqateqarniarnerigaluaq tamatumuunakkut mattunneqavittarmat, qaqilerilluni apeqquteqaqqinnissamut periarfissaqartitsisarani.

Isumasioqatigiinnermi tusagassiortut peqataasut arlaleriarlutik misigisarsimavaat qinikkat apersorneqarnissaminnut piffissaqaratik akissuteqartitsisarnerat.

Ataatsimiinnermi tusagassiortut peqataasut isumaqatigiipput qinikkat tusagassiortullu akornanni suleriaatsit pillugit politikerinik qulliunerusunik ukiaru ataatsimeeqatiserinnittoqassasoq.

- Politikerit periarfissikkusuppavut innuttaasunut attaveqartarnerminni suleriaatsiminnik saqqummiussinissaannut, innuttaasunillu akuutitsineq qanoq paasisarneraat. Aammali tusartikkusupparput suleriaatsit uagut qanoq isumaqarfiginerivut, Juaaka Lyberth, Tusagassiuinermi sulisut peqatigiiffianni, TP-mi, siulittaasoq oqarpoq.

- Politikerit tusagassiortullu imminnut pinngitsoorsinnaanngillat, upperaarpullu naapeqatigiinneq suleqatigiinnerup oqinnerulerneranik kinguneqarsinnaasoq, aammali politikerit tusagassiortullu akornanni ataqqeqatigiinnerup uterteqqinneqarnissaa angorusupparput.

- Tusagassiortut suliassaasa ilagaat innuttaasut sinnerlugit inuiaqatigiit politikkikkut sullinneqarnerannik nakkutilliisuunissaq, politikerillu soqutiginerusariaqarpaat ulluinnarni ingerlatsinerminni suliaminnik innuttaasut malinnaatinneqarnerunissaat, taamaanngippat innuttaasut akuliusimatinneqarnissaannik oqartussaaqataatinnissaannillu isumat nungukkaluttuinnalissammata.