Tusagassiortunik katersortitsineq: Akiuussutissalerneqarsimanngitsut imerniartarfinnut neriniartarfinnullu iseqqusaajunnaartut

Naalakkersuisup Pele Brobergip marlunngornermi ullup-qeqqanut tusagassiortunik katersortitsinermi ilisimatitsissutigaa, Namminersorlutik Oqartussat killilersuutigigallagaat, najugaqarfinni tunillaassuisutut ilisimaneqanngitsunit tunillaassuiffiuni maannamut taamaallaat atuutsinneqarsimasut, nunami tamarmi atuutsinneqalersut.

Aamma 15-inorlugit ukioqanngikkaanni imaluunniit tamakkiisumik akiuussutissalerneqarsimanngikkaanni kikkut tamarmik iserfigisinnaasaannut isernissaq inerteqqutaalerpoq.

- 15-ilereersimasut utoqqaanerusulluunniit akiuussutissalerneqarsimanngitsut, suliassaminnik suliaqarnianngikkunik, kikkut tamarmik iserfigisinnaasaannut iseqqusaajunnaarput. Tassa akiuussutissalerneqarsimanngitsut pingasunngornermiit februaarip 14-iat ilanngullugu neriniartarfinnut, filmertarfinnut imerniartarfinnullu iseqqusaajunnaarput, Pele Broberg (N) oqarpoq.

Tamanna aamma timersoqatigiit klubbiinut timigissartarfinnullu atuuppoq.

Inerteqqut taanna atugassanik pisiniarfinnut, allakkerivinnut, timmisartoqarfinnut, sullissisarfinnut, pisortat sullissisarfiinut kiisalu suliffeqarfinnut pilersuisartunut aamma tamanik angallassisarfinnut atatillugu utaqqisarfinnut suli atuutsinneqanngilaq.

Nunatsinni nakorsaanerup Henrik L. Hansenip oqaatigaa, killilersuut pineqartoq atuutsinneqalersoq, akiuussutissalerneqarsimanngitsut coronapassimik pissarsiniarlutik CPR atorlugu misissorneqarsinnaajunnaarnerat pissutigalugu. Peqqinnissaqarfimmi sulisut misissuisarunnaarnissaat peqqinnissaqarfimmilu coronamik allatigut isumaginnitsinneqartalernissaat salliutinneqarsimammat.

Covid-19-imik tunillatsissimanermut atatillugu PCR atorlugu misissortissimagaanni, sullissivik.gl-ikkut tunillanneqarsinnaannginnermut uppernarsaammik piniartoqarfinnaavoq. Taanna misissortissimanermiit sapaatip-akunnerisa marluk aqqaneq-alullu qaangiunneranni uppernarsaatigut atorneqarsinnaavoq, taamalu akiuussutissalerneqarsimanngikkaluaraanniluunniit kikkut tamarmik iserfigisinnaasaannut timersoqatigiillu klubbiinut il. il. isertoqarsinnaalissalluni.

Sassaallertarfinnut killilersuutit sapaatip-akunneranik ataatsimik sivitsorneqartut

Brobergip ilanngullugu ilisimatitsissutigaa, killilersuutit nutaat Inatsisartuni partiit siulittaasui peqatigalugit suliarineqarsimasut, killilersuutaalersullu unnuap-qeqqaniit februaarip 14-iat ilanngullugu atuutissasut.

Killilersuutinik allannguinermi aamma nunami tamarmi kikkut tamarmik iserfigisinnaasaannut isissagaanni qanermut assiaqummik visirimilluunniit atuinisssaq piumasaqaataalerpoq, aamma qatserisartutut oqartussat isersimaffigisinnaasatut akuerisaanni inuit isersimasinnaatitaasut affaannaai isersimasinnaatitaalerput.

Sassaallertarfinnut killilersuutit sapaatip-akunneranik ataatsimik sivitsorneqarput. Tassa sassaallertarfiit tamarmik unnukkut quliniit ullaakkut tallimat tungaannut imigassamik sassaalleqqusaanngillat. Sassaallertarfiit aamma siusinnerusukkut unnukkut qulinut matusartussaasimapput.

Tikinnermi piumasaqaatit allanngortinneqartut

Tamakkua saniatigut nunamut tikinnermi killersuutit aamma allanngortinneqarput.

- Nunamut tikinnermut atatillugu PVR atorlugu misissortissimanermut uppernarsaammik takutitsinissamut piumasaqaat atorunnaarsinneqarpoq. Tikinnermi piumasaqaatit allat maannatut isikkoqartillugit atuutsiinnarneqassapput. Napparsimagaanni soorunami aallartoqannginnissaa suli kaammattuutaavoq, Pele Broberg oqarpoq.

Taassuma ilanngullugu ilisimatitsissutigaa, akiuussutissalerneqarsimanngitsut nunami maani angalanerminni PCR atorlugu misissortissimanerminni tunillatsissimannginnermut uppernarsaateqarnissaannik piumasaqaat ilanngullugu atorunnaarsinneqartoq.

- Akiuussutissalerneqarsimanngitsut tikinnerminni ulluni tallimani mattusimanissaannik piumasaqaat atuutsiinnarneqaråpq, PCR-ili atorlugu misissortissimanissamik piumasaqaat atorunnaarsinneqarluni. Tassungali taarsiullugut kviktestimik atuisarnissaq inassutigerusuppara, Pele Broberg oqarpoq.

Nunatsinni nakorsaanerup peqqinnissaqarfiullu inassuteqaatai malinneqartut

Pele Brobergip erseqqissaassutigaa, nunatsinni nakorsaanerup peqqinnissaqarfiullu inassuteqaatai malillugit killilersuutit sivitsorneqartut.

- Kisitsisitigut paasissutissat qiviarutsigit ajornerpaaq suli qaangersimanngilarput, Pele Broberg oqarpoq.

Nunatsinni nakorsaaneq Henrik L. Hansen tusagassiortunik katersortitsinermut aamma peqataavoq, taassumalu erseqqissumik oqaatigaa, Kalaallit Nunaanni Peqqinnissaqarfik coronap maanna tuniluunneranit tatineqarsimasoq.

Sulisussat amigaatigineqartut – suliarinninnissat kinguartinneqarsimasut

Nunatsinni nakorsaanerup oqaluttuaraa, peqqinnissaqarfik sulisunik amigaateqartoq, sulisorpassuit coronamik tunillatsissimanertik pissutigalugu angerlarsimaannarmata.

- Danmarkimi inissisimasoqarnera pissutigalugu sulisussanik pissarsiniarneq ajornakusoorpoq. Tamatuma malitgisigaanik suliarnninnissaat ilaat maannakkorpiaq kinguartinneqartariaqarsimapput.

- Erseqqissaassutigissallugu pingaaruteqarpoq, pinartumik suliarineqartariaqartut tamarmik suliassallu kinguartinneqarsinnaanngitsut tamarmik allanngortinneqanngimmata, nunatsinni nakorsaaneq Henrik L. Hansen oqarpoq.

Nunatsinni nakorsaanerup oqaatigaa, mattusimanissamut malittarisassanik killilersuutinillu allanik atuutsitsiinnarnermi tuniluuttoqarnerata kingaallatsilaarneqarnissaa anguniagaasoq:

- Ataatsimut tamaasa isigalugit, tuniluuttoqarnerata ingerlaannarnissaanut sanilliullugu tuniluunnerup piffissamut sivisunerusumut siammarneqarnissaa sulis soqutigisaraarput.

-Sumiiffippassuarni suli tuniluuttoqaqaaq. Misissortissimanermi akissutit ippassaq pissarsiatta takutippaat, misissortissimasut 58 procentiinit ikinnerunngitsut tunillatsissimasut. Inuit aalajangersimasut misissorneqarsimagaluarput, taamaakkaluartoq tamatuma takutippaa suli tuniluuttoqangaatsiartoq, tuniluuttoqarneralu sapaatip-akunnialuini suli ingerlaannassasoq.