Tusagassiorfik: VM pillugu atuagassiaq aqqutissiuisoralugu
Aviisit nuna tamakkerlugu saqqummertartut AG aamma Sermitsiaq nutaamik nutaaliaanerusumillu e-aviisinut atuaammik peqalerpoq – VM pillugu aviisip saqqummertussap piffiit nutaat aallartissavai.
- Atuartartut nutaaliorneq tigulluarumaaraat neriuutigaara. Digitalimik saqqummersittakkatsinnut nutaaliamik atuaruminarnerusumillu ineriartortitsiniarluta aningaasaannaanngitsunik aamma annertuumik sulisunik atuinikkut aningaasaliissuteqarpugut.
Tusagassiorfimmi Sermitsiaq.AG-mi pisortaaneq, Christian Schultz-Lorentzen, tusagassiorfiup e-aviisinut atuaataanik nutaamik VM pillugu atuagassiamik saqqummersitsinermi pingasunngornermi atulersitsinermi taama oqaluttuarpoq.
- VM pillugu sammisaq nittarsaassinermut ilaavoq. Kisianni pitsannguineq siullertut aviisinut nuna tamakkerlugu saqqummertartunut Sermitsiamut aamma AG-mut nukittorsaatitut saqqummersinneqarput, kisianni aamma arnanut atuagassiaq Arnanut, Suluk aamma aviisi qulequttanut aalajangersimasunut tunngasut paasititsiniaallunilu aviisit saqqummertartut teknik nutaaq iluaqutigissavaat, Christian Schultz-Lorentzen oqarpoq, nangillunilu:
- Pitsaassusilimmik tusagassiornerit ingerlatiinnarsinnaagutsigit aamma tuniniaanermi suliniutit inissinneqarpata, e-aviisit AG-tut Sermitsitullu ittut periarfissaqarluarput. Ullumikkut aviisit tunisatta affaasa missaat digitaliupput. Tusagassiorfinnut allanut sanilliulluta tamanna pitsaalluinnarpoq. Nittartagaq nutaarsiassaqartitsivik nukittooq aamma e-aviisit digitaliusut tusagassiorfiup siunissaanut pingaaruteqarluinnartut ilagaat, Christian Schultz-Lorentzen, nittarsaassinerup tungaatigut immikkuullarissumik toqqaasimasoq taama oqarpoq.
Akileerusussuseqarneq misilinneqarniartoq
Ullut arlaqanngitsut qaangiuppata isikkamik arsarluni VM-erneq aallartissaaq. Taamaattumillu oqaatsit marluk atorlugit VM pillugu atuagassiornissaq naleqqulluinnarpoq, pisortaq oqarpoq.
- Kalaallit Nunaat nuna arsaattunik soqutiginniffiuvoq. Tamatuma peqatigisaanik tunisassiaq akeqartussaq tassani pineqarpoq. Taamaammat tusagassianik digitaliusunik nioqqutinut tunngatillugu peqatigisaanik nittartakkatsinni Sermitsiaq.AG-mi akileerusussuseqarneq misilinniarparput, Christian Schultz-Lorentzen oqarpoq.
E-aviisit nutarterneqarnerisa atuisut malunnaatilimmik pitsaanerusumik atuarsinnaanermik misigisaqartissagai, taassuma ilimagilluinnarpaa. Ilaatigut pitsaanerusumik qanillisitsisaaserneqarneratigut. Tuniniaanermullu tunngatillugu nutaanik periarfissaqalissaaq. E-aviisinilu quppernerit akornanni ussassaarutinik inissiisoqarsinnaalissaaq.
