Tusagassiorfik: Trumpip nunarput pisiariniarlugu isumaliutersuuteqartoq

USA-p præsedentiata Kalaallit Nunaat pisiariniarlugu isumaliutersuuteqarnerarneqarpoq. Tusarfiit arlallit kinaassutsiminnik isertuussisut, suliamik ilisimasaqartut, amerikamiut aviisiannut Wall Street Journalimut taama oqarput.

Donald Trumpi arlaleriarluni – ilumoorsaarfeqarluni – nunarsuarmi qeqertat annersaat pisiariniarlugu siunnersortiminut isumaliutersuutersuuteqartarsimavoq.

Trumpip ataatsimiinnerni, nereqatigiinnerni aamma siunnersortiminik oqaloqateqarnermini, USA-p Kalaallit Nunaat pisiarisinnaaneraa aperisarsimasoq tusarfiit oqaluttuarput.

Kalaallit Nunaata pisuussutai aamma nunap inissisimanerata pingaassusaa pillugu oqaluuserinninnerni arlaleriarluni aamma oqaluuserinnittarsimavoq.

Tusarfiillu marluk Wall Street Journalimut oqaloqatiginnittut marluk oqarneri naapertorlugit, Det Hvide Husimi siunnersorti periarfissamik misissuinissaanik Trumpip qinnuigisimavaa.

Præsidentip siunnersortaasa ilaasa isumassarsiaq tapersersorsimavaat, aningaasaqarnikkut akilersinnaaneranik tunngavilersuillutik, allallu Trumpip isumassarsiarisimasaa piviusunngunngisaannartussatut oqaatigalugu.

Præsidentip ilumoorsaarluni tamanna kissaatigilissappagu, USA-p Kalaallit Nunaata pisiariniarneranut kissaateqarneq qanoq qisuariarfigissaneraa aamma nalunarpoq, Wall Street Journal taama allappoq.

Kalaallit Nunaat Danmarkimit 1720-ikkunni nunasiaatigineqalersoq, 2009-imili Danmark naalagaaffeqatigalugu namminersortunngorpoq.

Trumpip soqutiginninnera pillugu nalunaaruteqartoqarnerani Wall Street Journal Kalaallit Nunaannit imaluunniit Danmarkimit oqaaseqartitsinissaq iluatsissimanngilaq.

Suliaq pillugu aviisip Det Hvide Husimut oqaaseqartitsiniarnera akissuteqarfigineqanngilaq.

Trumpip isumassarsiaq qanoq pimoorutsiginiarneraa nalunarnerani, USA-p Kalaallit Nunaat amerikamiut soqutigisaannut pingaaruteqartippaa.

Kalaallit Nunaat Amerikap Avannaani inissisimavoq, Canadap avannaata kangiani, kisianni oqaluttuarisaanikkut, politikkikkut aningaasaqarnikkullu nuna Europamut qanittuuvoq.

Trumpi septembarip 2.-3.-anni Danmarkimut tikeraassaaq, tassani Kalaallit Nunaat aamma Issittoq pillugu apeqqutit oqaluuserisassanut ilaapput.

Præsidentip tikeraarnermini ministeriuneq Mette Frederiksen (S) aamma Naalakkersuisut siulittaasuat, Kim Kielsen naapissavai.