Tusagassiorfik: Ministereqarfik Kalaallit Nunaanni ilisimatusarnikkut suliniummik unitsitsisimasoq
Aasaq manna ilisimatusaatitut angalanermi silap pissusianut tunngasunik ilisimatusartut siullerpaameerlutik Kalaallit Nunaat kaajallallugu angalasussaasimagaluarput
Taama Politiken ataasinngornermi allappoq.
Namminersorlutik Oqartussat ilisimatusarnerup ilaanut nunami ingerlanneqartussamut akuersissutiginnissimapput, angalanissaagaluarli maajimi kingunartinneqartariaqarsimavoq, paasinarsimmat Københavnimi Nunanut allanut ministereqarfik qaammatini tallimani suliamik ingerlatsereeraluarluni Kalaallit Nunaata eqqaatigut umiarsuarmik angalanissamut suli akuersissuteqarsimanngitsoq.
Angalanissaq Schweizimi issittoq pillugu ilisimatusarfik polarinstitut SPI aaqqissuunneqarsimavoq ukiullu arlallit atorlugit pilersikkiartuaarneqarsimalluni. Peqataasussat akornanniipput ilisimatuut Københavns Universitetimeersut. Ilisimatuut ilaatigutsermersuarmi qillerinikkut sermimik qalluisussaasimagaluarput sermersuullu aakkiartornerata immamut sunniutaanik misissuisussaasimagaluarlutik. Tamatumani siunertaq tassaavoq »sumiiffimmi silap pissusiata allanngoriartorneranit sakkortuumik sunnersimaneqartumi ineriartornermik tamakkiisumik asseqanngitsumillu paasiniaanissaq«.
Nassuiaat
Nunanut allanut ministereqarfik aamma Namminersorlutik Oqartussat pilersaarutinut nassuiaammik ukiup ataatsip sinnerlugu matuma siorna tunineqarput. Taamani ajornartorsiutinik pilersoqarsinnaaneranut takussutissaqanngilaq, SPI-mi pisortaq Danièle Rod Politikenimut oqaluttuarpoq.
- Sooq taama pisoqarnersoq ilisimanngilarput. Pissutaasut arlalissuusinnaapput, kisianni Issittumi pissutsit nalinginnaasut pisariuneruleriartorput, Danièle Rod oqarpoq.
Oqartussat aamma ilisimatinneqarput ilisimatusaatitut angalaneq russit umiarsuaat ilisimatusaataasoq atorlugu ingerlanneqartussaasoq. Umiarsuaq Kalaallit Nunaata avannaarsuani russit umiarsuaannik aerorterummik atomimik ingerlatilimmik ikiorteqtussaasimagaluarpoq. Rusland nunarsuarmi sikunik aserorterutit amerlanersaannik pigisaqarpoq, russillu umiarsuaat ilisimatusaataasut akikitsuusutut suliamullu ilisimaarinnilluartumik ingerlatsisuusartutut isigineqarput.
Isertortumik paasiniaaneq
Tusarfik Kalaallit Nunaanni sakkutooqarnermut tunngasunik ilisimasaqarluartoq, kinaassutsiminik isertuussiumasoq, erseqqissaalluni oqarpoq, Nunanut allanut ministereqarfiup suliniutip unitsinnissaa kissaatigisimasinnaagaa angalanerup isertortumik paasiniaanermut Ruslandimit atorneqarsinnaanera pinngitsoorniarlugu.
- Ilisimatuussutsikkut siunertat tunngaviliullugit isertortumik paasiniaanermik suliaqartoqaratarsinnaanera ilimanaateqarpoq, oqarpoq.
Assersuutigalugu russit umiarsuaasa angalanermi immap naqqanik kabelinillu attaveqaatinik paasissutissanik pissarsiniarfigisinnaajumallugit qulaajaassagaluarpata tamanna ajornartorsiutaasinnaavoq.
Politikenip Nunanut allanut ministereqarfik apererusussimagaluarpaa, akuersissuteqannginnermut tamanna pissutaanersoq, kisianni ministereqarfiup pisoq oqaaseqarfigerusussimanngilaa.