Tusagassiorfik: Løkke USA-lu timmisartoqarfinnut aningaasaliissuteqarnissaq pillugu attaveqaqatigiissimasut
Lars Løkke Rasmussenip naalakkersuisuutitaasa timmisartoqarfinnut aningaasatigut ikiuunnissamut aalajangersimannerannut, kiniiserit USA-mit sunniuteqarnaveersaartinniarnerannik pissuteqarpoq, tusagassiorfik Politico allappoq.
USA-p Danmarkullu attaveqaqatigiissimanerisa malitsigisaannik Lars Løkke Rasmussen aalajangersimavoq, Kalaallit Nunaanni timmisartoqarfiliornissamut akuliunniarluni. Republikanerit partiiannit tusarfik tusagassiorfimmut Politicomut oqarpoq.
Wall Street Journal siorna allappoq, Lars Løkke Rasmussen (V) aningaasaliissuteqarnissaq taarsigassarsisitsinissarlu pillugit aalajangiisoqartinnagu Amerikami taamanikkut illersornissamut ministeriusumik ataatsimeeqateqarsimasoq.
Tamanna sioqqullugu taamanikkut ministeriunerusup arlaleriarluni oqaatigisarsimavaa, timmisartoqarfiliorniarnerit aningaasatigut imminnut napatissinnaanersut qularalugit.
Kina Ruslandlilu ilaatinneqassanngitsut
Republikanerit partiianni ilaasortatut qitiusutut sulisup maanna oqaatigaa, USA-mit attaveqaatit Lars Løkke Rasmussen qularunnaarsissimagaat.
- Tamatuma akerleriiffiulernissaa ilimaginngilara. …. Kinap Ruslandillu danskinik qanoq suleqateqarunnaarsinneqarnerat, taamaaliorpugut Kalaallit Nunaata Kujataani kiniseerit timmisartoqarfiliorsinnaanerat akornguserniarlugu, sulisoq Kalaallit Nunaata sannaanik ilisimasaqarpasinngitsoq Politicomut oqarpoq.
Naalagaaffeqatigiit ataatsimiinneranni isumaqatigiissuteqarneq
Lars løkke Rasmussenip 2018-imi maajip qaammataani oqaatigaa Kalaallit Nunaannit timmisartoqarfiliornissamut aningaasaliissuteqarsinnaallutik, qaammatillu ataatsip qaangiunnerani naalagaaffeqatigiit ataatsimeeqatigiinnerannut atatillugu Kim Kielsenilu isumaqatigiipput, danskit peqataasinnaanerat misissorneqassasoq.
Ukioq taanna septemberip qaammataani, Ilulissani Nuummilu timmisartoqarfiliornissamut 700 millioner koruuninik danskit naalagaaffiat aningaasaliissuteqassasoq, 450 millioner koruuninik taarsigassarsisitsissasoq timmisartoqarfinnullu taakkununnga marlunnut atatillugu immikkut aamma 450 millioner koruuninik qularnaveeqqusiissasoq pillugit isumaqatigiissummik Kim Kielsen atsioqatigaa.
Amerikamiut aningaasaliissuteqarusussuseqarnerat
Qammammi pineqartumi kingusinnerusukkut Amerikami illersornissamut ministerip tullersortaata John Roodip, Amerikami illersornissamut ministeeriaqarfiup 'Kalaallit Nunaanni timmisartoqarfiliorniarnermut atatillugu suliniutinut , aamma suliniutinut sakkutuujunngitsut sakkutuullu atorsinnaasaannut aningaasaliissuteqarsinnaaneq pillugit misissueqqissaarnissamik' siunnerfeqarneq atsiorpaa.
Amerikamiut Københavnimi aallartitaqarfianit nalunaarutigineqarpoq, aningaasaliissutissat taakku sumut qanorlu inissinneqassanersut pillugit maannakkorpiaq suli nutaarsiassaateqartoqanngitsoq.