Tusagassiorfik: Kalaallit Nunaata pisiarinissaanut pinnersaasiortup aningaasaatilissuup Trumpimut siunnersuisimasoq
USA-p Kalaallit Nunaata pisiarinissaanut Donald Trumpip ikinngutaasa siunnersorsimagaat New York Times allappoq. Taamaasilluni Kalaallit Nunaannut pisinissamut suliaq allatorujussuaq isikkoqalerpoq, malinnaasoq oqarpoq.
Donald Trumpip Kalaallit Nunaannik pisiniarluni suaaruteqarnera pillugu amerikarmiut tusagassiorfiat New York Times nutaanik paasissutissanik saqqummiussaqarpoq.
Pinnersaasiortup aningaasaatilissuup, Donald Trumpimik ikinnguteqartup, Ronald S. Lauderip, Kalaallit Nunaata pisiarineqarnissaa pillugu Trumpip præsidentinngoqqammernerani siunnersorsimavaa, New York Times allappoq.
"Ikinnguteqarpunga inuussutissarsiornermik misilittagaqarluartumik. Taanna isumaqarpoq Kalaallit Nunaat pisiarissagipput. Illit qanoq isumaqarpit?", illersornissamut siunnersuisuminut Donald Trump oqarsimanerarneqarpoq. Taanna pereersoq eqqarsaat piviusunngortinniarlugu sulisoqalerpoq. Kalaallit Nunaata pisiarinissaanut tunngatillugu allagaqaateqartoqarpoq, New Yorkimi attartornermut isumaqatigiissutaasartumut assingusumik attartornissamik isumaqatigiissummik allagaqaateqartoqarluni, New York Times allappoq.
Oqaloqatigiinnerit isertortut - suliap isikkuanut allannguivoq
Ronald S. Louder Danmarkimut isumaqatiginninniartussatut nammineq neqeroorsimasoq New York Times tusagassiivoq. USA-p Danmarkimi aallartitaalu isertortumik oqaloqatigilerlugu.
Isertortumik oqaloqatigiittoqarsimanera pissutaalluni Kalaallit Nunaannik pisinissamik suliap isikkua allanngortoq, tusagassiortoq Issittumilu pissutsinik malinnaasoq, Martin Breum, Sermitsiaq.AG-mut oqaatigaa:
- USA-p Kalaallit Nunaannik pisinissaanut suli avammut nalunaarutigineqannginnerani USA-p Danmarkimi aallartitaata Donald Trumpip siunnertaa ilisimasimappagu, Danmarkip Kalaallit Nunaatalu suleriaaserisimasaat allatut isikkoqarluinnalerpoq.
Atuakkami saqqummeqqammersussami ilaavoq
- Nuummi Københavnimilu politikkikkut aalajangiisartut Trumpip pisinissamik takorluugaat ilisimaqqaarsimanngilaat. Aatsaat Washington Post 2019-mi aggustimi saqqummiunneqarmat aatsaat tassani pilersaarutaasut ilisimalersimallugu attappaat.
Kalaallit Nunaat Danmarkimit pisiarineqarnissaanik USA-p soqutiginninnera nutaarsiassatigut nunarsuarmi ingerlaarpoq aggustimi 2019-mi. Tassani nalunaaruteqarpoq Trumpip præsidentiunermini Kalaallit Nunaat pisiarerusukkaa. Eqqarsaalli statsministerimit Mette Frederiksenimit Naalakkersuisunilu siulittaasuusimasumit Kim Kielsenimit itigartinneqarpoq. Itigartitsineq tunngavigalugu Trumpip Danmarkimut tikeraarnissaraluani taamaatiinnarpaa.
Præsidentiusimasup qanimut suleqatigisimasai qanimut apersorneqarsimaneri pillugit paasissutissat nutaat saqqummiunneqarput, atuakkiarineqarportaaq, taannalu sapaatip akunnerani matumani saqqummissaaq. Atugaq tusagassiortunit marlunnit allanneqarpoq - tusagassiortup aappaa atuakkioqataasoq New York Timesimi sulisuuvoq, atuakkiarisimasaalu "The Divider: Trump in the White House, 2017-2021"-mik qulequtaqarluni.