Tusagassiorfik serlersaarfigineqarsimasoq
Tusagassiorfimmi sulisut tallimanngormat ullaakkut suliartoramik allanerusumik takusaqarput, ujarammi angisooq igaffiup igalaavatigut ilummut milorujunneqarsimavoq.
Kalaallit Nunaanni Politiit ilisimatitsissutigaat, tallimanngormat ullaakkut nalunaarfigineqarsimallutik, Tusagassiorfimmi Sermitsiaq.AG-mi serlersaarisoqarsimanera pillugu, politillu aggersimasut ajoqutinik misissuiartorlutik.
- Ujaqqamik igalaaq nalunaaquttap 07.45-p 07.50-illu akornanni aserorneqarsimavoq. Takunnittoqarsimanngilarli, taamaammat arlaat takunnissimappat politiinut saaffiginneqqueqarpoq, Kalaallit Nunaanni Politiit pigaartuisa pisortaat Preben Kleist Sermitsiq.AG-mut oqarpoq.
Tusagassiorfimmi sulisuni ataaseq arlallilluunniit tusagassiorfimmiinnerani ujarak igalaakkut ilummut milorujunneqarsimasoq sulisunit takuneqarsimavoq.
Tamanna pimmat tusagassiorfimmiissimasoq
Aviisimi Sermitsiami aaqqissuisuuneq Poul Krarup oqaluttuaraa, tusagassiorfimmi inimi qullermiikkaluarluni tamanna pimmat tusaasaqarsimanani.
- Sulisup ullaaq arfineq-pingasunngulivissoq ujarak pillugu ilisimatippaanga, tamatumalu kingorna politiinut sianerpugut aamma pisoq sillimmasiisarfimmut nalunaarutigaarput.
Poul Krarupip oqaluttuaraa, aatsaat siullermeersumik tusagassiorfimmi taamatut pisoqanngitsoq.
- Siusinnerusukkut arlaleriarluni tusagassiorfimmut tillinniartoqartarsimavoq, tamatigulli unnuakkut tillinniartoqartarluni, nalilinnik silamiit takuneqarsinnaasunik, soorlu qarasaasiat angallattakkat tillinneqartarsimapput. Igalaat aseroriarlugit iserluni pigisanik tillittoqartarsimavoq, taanna oqarpoq.
Siusinnerusukkut tillinniartoqartarneratut inngitsoq
Maanna pisut siusinnerusukkut pisartunit allaanerupput, Poul Krarup oqarpoq.
- Sooq igalaaq aseroriarlugu ujarak igaalaap saavanut ilineqarsimanersoq paasisinnaanngilara. Tillinniarniarnani serlersaariniarsimasutut isikkoqarneruvoq, aaqqissuisuuneq Poul Krarup oqarpoq.
Taassuma politiit sianerfigineqatsiarsimallutik takkunnerat nersualaarpaa.
Pisoq pillugu paasissutissaateqaraanni Kalaallit Nunaanni Politiit oqarasuaammut 70 14 48-mut sianerfigalugit ilisimatitsissuteqartoqarsinnaavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...