umiarsuit assartuutit
Tusagassiorfik: Royal Arctic Linep umiarsuit marluk taamaatiinnarpai
Marine Danmarkip paasissutissiinera naapertorlugu Kalaallit Nunaanni umiarsuaatileqatigiit annersaata Gdanskimi umiarsualiorfimmi Remontowami umiarsuit sanatitami ilaat marluk taamaatiinnarpai
Kalaallit Nunaanni umiarsuaatileqatigiit annersaata Royal Arctic Linep Polenimi Gdanskimi umiarsualiorfimmi Remontowami umiarsuit sanatitami sisamat ilaat marluk taamaatiinnarsimavai.
Taakkkua tassaanerarneqarput umiarsuit annersaat Malik Arctica, akunnattumillu angissusillit nunaqarfinnut assartuutit ilaat Agnethe Arctica.
Tunuartinngilaa
Maritime Danmarkip paasissutissat paasisaqarfinnit attuumassuteqanngitsunit marlunnit uppernarsartissimavai, taakkuali marluullutik kinaassutsiminnik isertuusserusussimapput.
Royal Arctic Linemi attaveqarnermut tuniniaanermullu pisortap Ann-Britta A. Hansenip tusagassiorfimmut uppernarsarumanngilaa umiarsuaatileqatigiiffiup umiarsuit marluk taamaatiinnarsimagai, aappaatigulli aamma paasissutissat kukkusuunersut oqaatigiumanagu.
– Tamanna oqaaseqarfigisinnaanngilarput, Ann-Britta A. Hansen Maritime Danmarkimut oqarpoq.
Royal Arctic Line 2013-imi Polenimi umiarsualiorfimmik isumaqatigiissuteqarpoq umiarsuarnik immikkut sanaanik tallimanik sananissamik, umiarsuaq angisooq containerersuut - Malik Arctica - umiarsuup Mary Arcticap, ullumikkut Nuup Aalborgillu akornanni assartuutaasup, assinga ineriartorteqqitaq, kiisalu nunaqarfinnut umiarsuit sisamat.