Tusagassiorfik: Obamap Issittumi uuliamik qillerinissat unitsinniarpai

Naatsorsuutigineqarpoq USA-p præsidentiata Barack Obamap nalunaarutiginiaraa aalajangerluni, ukioq 2022-ip tungaanut Issittumi Atlantikumilu uuliamik gas-imillu qillerisoqarsinnaassanngitsoq.

Naatsorsuutigineqarpoq tamanna marlunngornermi nalunaarutigissamaaraa, tuluit tusagassiorfiat The Guardian allappoq.

Issittup illersorneqarnera

Danmarkimi Greenpeacemi Issittumut akisussaasup Jon Burgwaldip USA-p taamaasiorniarnera nuannaarutigeqaa.

– Tamanna Issittup illersorneqarneranut alloriarnerujussuussaaq. USA-p maanna nassuerutigerpasippaa Issittumi uuliamik qillerineq ulorianarpallaartoq, Parisimilu isumaqatigiissummut (2015-imi Cop21-mi isumaqatigiissut, aaqqiss.) akerliulluinnartoq. Aammalu silap pissusiata allanngoriartornerata unitsinneqarnissaa pisariaqartoq, Jon Burgwald oqarpoq.

Tamanna peqatigalugu erseqqissarpaa taamatut aalajangiisoqarniarnera ´avatangiisinut pinngortitamullu neriulluarnartorujussuusoq, Kalaallillu Nunaat Danmarkilu piaarnerpaamik taamatut aalajangiisariaqartut´.

Siunissamut eqquiniut

– Kalaallit Nunaat uuliasiornissamut nutaamik akuersissuteqassamaarpoq, politikerit ilaasa uulia siunissamut eqquiniutitut isigimmassuk, Greenpeacemi Issittumut akisussaasoq tikkuaavoq.

Taamatuttaaq isumaqarpoq Barack Obamap aalajangerniarnerata takutikkaa Naalakkersuisut takusinnaanngikkaat nunarsuaq uuliamik annertunerusumik nassaarniarnissaminut akissaqarnanilu atorfissaqartitsinngitsoq - ingammik Issittumi ulorianartorsiorfiunerpaami sunnertianerpaamilu.

– Taamaattumik Kalaallit Nunaat malinnaasariaqarpoq, uuliasiorneq unitsivillugu ineriartornissamullu periarfissat pitsaanerusut mingutsitsinnginnerusullu sammillugit, Jon Burgwald oqarpoq.