Tusagassiorfik naatsorsuutinik kusanartunik saqqummiussisoq
Sermitsiaq.AG ukiumoortumik naatsorsuutinik 2018-imi 4,7 millioner koruuninik sinneqartooruteqarsimanermik ersersitsisunik pingasunngornermi saqqummiussivoq. Siulersuisunit angusat naammagisimaarnartutut oqaatigineqarput.
Tusagassiorfik Sermitsiaq.AG 2018-imi kusanartumik angusaqarpoq. Suliffeqarfiup 2018-imut ukiumoortumik naatsorsuutai tamanut saqqummiunneqaqqammersut naapertorlugit akileraarutit ilanngaatigereerlugit 4,7 millioner koruunit sinneqartoorutigineqarput.
Siorna sinneqartoorutigineqartut 5,5 millioner koruuningajaapput. Tamatuma peqatigisaanik tusagassiorfik allamik siulittaasortaarpoq, Jørgen Ejbøl ukiutigut killissat tunngavigalugit tunuartariaqalermat.
Ulluinnarni aqutsisunit siulersuisunillu angusat naammagisimaarneqarput. Angusat siunissami Kalaallit Nunaanni naqisimaneqanngitsumik attuumassuteqanngitsumillu tusagassiuuteqarnermut qulakkeerinneqataassapput.
- Kisianni assoruuttoqassaaq, Sermitsiaq.AG-p pisortaa Christian Schultz-Lorentzen oqarpoq nangillunilu:
- Tusagassiuutit naqisimaneqanngitsut unammilligassarpassuaqarput. Kalaallit Nunaanniinnaanngitsoq, aammali nunarsuaq tamakkerlugu. Google aamma facebook ussassaaruteqartarfittut assersuutigalugu unammillertaapput ilungersunartut. Tamanna 2018-imi malugaarput, ussassaarutitigut isertitavut ukiup siulianut sanilliullugu 1,1 millioner koruuninik ikileriarmata.
- Kisianni atugassarititaasut taamaapput. Nunarsuaq allanngoriartorpoq. Aamma nappajaqarunnaarsimavoq. Tamatta ineriartornissamut minnerunngitsumillu isertitassanik nutaanik nassaarniarnissamut piareersimasariaqarpugut. Oqaatsit naqisimaneqanngitsut aningaasaqarnikkut patajaatsumik tunngaveqanngitsut nalilerujussuunngillat. Aaqqissuisoqarfinnik tusagassiornermik pitsaassuseqarluartumik tunniussaqarsinaasunik ingerlatsineq akeqarpoq. Qujanartumillu tamanna sapinngilarput, qaffasissutsini tamani ilungersorlutik sulisoqarnerput tunngavigalugu, Christian Schultz-Lorentzen oqarpoq.
Tusagassiorfiup saqqummersittarpai aviisit nuna tamakkerlugu saqqummersartut marluk, Sermitsiaq aamma AG, nunatsinni onlinemik tusagassiuutit annersaat Sermitsiaq.AG, Nuuk Ugeavis aamma arnanut atuagassiaq Arnanut. Tamatuma saniatigut timmisartuni atuagassiaq Suluk, Air Greenland sinnerlugu suliarineqartartoq.
Tusagassiorfik aaqqissuisoqarnikkut niuernikkullu ineriartornermut aningaasaliissuteqartarnerminik 2018-imi ingerlatitseqqippoq. Pingaarutilinnik arlalinnik angusaqarfiusumik. Nittartakkamut alakkaasartut 9,1 millioninut amerleriarput, 2017-imut sanilliullugu 6 procentinik amerleriaateqarlutik. Nittartakkami ussassaarutitigut isertitat 9,7 millioner koruuningajalluinnaapput.
Tusagassiorfik ukiut siulii assigalugit ingerlatsinermut tapiissutinik Namminersorlutik Oqartussanit tigusaqarsimavoq.
Aviisinik naqitanik marlunnik nioqquteqarnerup ineriartornera nunat killiit sinnerinisut 2017-imut sanilliullugu kinguariarfiusimavoq. Tamatuma akerlianik qarasaasiakkut aviisinik pisartagallit amerlassusaasa ineriartornerat suli pitsaasuuvoq. Aviisit ukiup ingerlanerani sammisat tunngavigalugit tapiliussanik saqqummersitsisarnerminni iluatsitsilluarsimapput.
Aviisi akeqanngitsoq Nuuk Ugeavis, Nuuk Lokalereklamemit saqqummersinneqartartoq, akileraarutit ilanngaatigereerlugit 53.000 koruuninik sinneqartooruteqarpoq, 2017-imi 124.000 koruuninik sinneqartooruteqarsimalluni. Illoqarfiup aviisia ikorfartuiffiginiarlugu tusagassiorfiup ukioq manna kvartalit siullianni Kalaallit Nunaanni illoqarfiit annersaannut nittartakkamik pilersitsissaaq.
- Tamanna pissaaq aaqqissuisoqarnikkut periarfissamik nukittunerusumik pilersitsiniarluni ussassaaruteqartartullu sunniuteqarsinnaanerat nukittorsarniarlugu. Nuuk siuariartorfiuvoq, digitalimmillu silarsuaq nutaaq aqqutigalugu tusagassiorfik saarlerpaami inissisimaqataarusuppoq, Christian Schultz-Lorentzen oqarpoq, paasissutissiillunilu, nittartagaq Sermitsiaq.AG-mut attuumassuteqassasoq, taamaalilluni atuartartut amerlasuut ullormi siullermiilli qulakkeerneqassasut. Nittartagaq aamma toqqaannartumik iserfigineqarsinnaassaaq una aqqutigalugu: www.nuuk-ugeavis.gl.
Ataatsimeersuarnermi Jørgen Ejbøl siulittaasutut tunuarpoq. Taama pisoqarpoq ukiutigut killissat 70-inik ukioqarneq pissutigalugu. Siulittaasunngortoq tassaavoq Jens Bruun, siulersuisunut 2017-imi qinigaasoq. Tusagassiuutinik sulialik misilittagartooq Jyllands-Postenimi ukiunik 25-nik aamma JP/Politikens Husimi pisortaanertut aqutsisoqatigiinnilu ukiunik qulinik misilittagaqartoq.
Siulersuisuni nutaartaavoq 54-inik ukiulik Ulla Lynge, Ilisimatusarfimmit cand.scient.adm.-itut ilinniagaqarsimasoq Londonimilu Henley Business Schoolimit MBA-mik allagartaqartoq. Ukiut ingerlaneranni Kalaallit Nunaanni qaffasissunik atorfeqartarsimavoq tatigisatullu inissisimaffeqartarsimalluni. Ullumikkut ilaatigut Nuuk City Developmentip siulersuisuinut ilaasortaavoq Kalaallit Nunaatalu Aningaasaqarneranut Siunnersuisoqatigiinni siulittaasumut tullersortaalluni. Sermersooq Business Councilimi pisortaasimavoq ullumikkulllu CSR Greenlandip allattoqarfiani pisortatut atorfeqarluni.