Tusagassiorfik annikitsumik sinneqartooruteqartoq
Sermitsiaq.AG-p 2022-mi pissutsit ilungersunaraluartut anigorsimavai. Angusaq siulersuisunit naammagisimaarneqarpoq.
- Coronamik nappaalanersuup eqqoriaruminaatsup Ukrainemilu sorsunnerup tusagassiorfiup 2022-mi angusai sunniuteqarfigisimavaat. Nunarsuarmi nalorninartumi inuuvugut. Taamaakkaluartoq Tusagassiorfiup saqqummersitat tamaasa suli amerlasuunik atuisoqartut attassinnaanissaat iluatsissimavaa. Piffissat ilungersunaraluartut aqutsisut sulisullu suliniarluarsimanerisigut suut tamarmik ajunngitsumik ingerlapput. Tamanna tupinnaqaaq, tusagassiorfiup Sermitsiaq.AG-p, ullumi siusinnerusukkut ataatsimeersuartup, siulersuisuini siulittaasoq, Lars Vesterløkke, oqarpoq.
2022-mut ukiumut angusat 565.000 koruuninik sinneqartooruteqarfiupput, 2021-mi pissutsinik immikkut ittunik malunnaateqarfiusimasumi, ilaatigut immikkut ittumik isertitaqarnermik, 4 millioner koruunit missingi sinneqartoorutaasimasut.
Aningaasaateqarfiup Inuussutissarsiummik Ingerlatsisup Sermitsiaq.AG-p tusagassiorfittut inuiaqatigiinnut attuumassuteqarluartutut saqqummersitsisarnikkut siunertaminik aalajangiusimannissinnaasimanerata peqatigisaanik tusagassiorfik piffissami aalajangiisuusumik allanngoriartorfimmiilersimavoq.
Sulisut pikkorissut piffissarli ilungersunartoq
Sermitsiaq.AG nunarsuarmi tusagassiorfiit allat assigalugit tusagassiuutinit naqitanit digitaliusunut ikaarsaariartorpoq.
- Suliaq tamanna siunnerfeqartumik ingerlaavartumillu suliaraarput. Kingullertigut e-aviisinik saqqummersittakkatsinnik annertuumik nutarterinermut aningaasaliisimavugut, tusagassiorfiup pisortaanera, Christian Schultz-Lorentzen, ukiumi angusat eqqarsaatigalugit ingerlatsinerup aningaasartuutillu 2022-mi annertuumik pitsanngorsaavigineqarsimanerannik tikkuussisoq, oqarpoq.
- Suliaq tamanna 2023-mi ingerlateqqinneqassaaq. Uannut ingerlatatsinnik ineriartortitsineq pineqartillugu ”annertussusiliineq” pingaarnertut oqaasiuvoq. Misigisassarsiornerit aallartittanngilavut, kisiannili pitsanngorsarniarluta ullormiit ullormut uuttortarsimasumik sulisarluta. Tusagassiuuteqarnermilli suliaqarfik ilungersunartorsiorpoq. Sunaluunniit pisussaannartut isigineqarsinnaanngilaq. Piffissaq ilungersunartuuvoq. Qujanartumilli pikkorissunik misilittagartuunillu sulisoqarpugut, Christian Schultz-Lorentzen oqarpoq, naqitanillu kiisalu nittartakkami tusagassiuuterpassuit aqqutigalugit innuttaasunut tamangajalluinnarnut attaveqarneq tusagassiorfiup nukittoqqutigigaa erseqqissaatigalugu. Tamanna tusagassiorfimmut nutaarsiassanik saqqummersitsisarnikkut sunniisinnaassuseqarluarnermik ussassaaruteqartartunullu sinaakkutissanik pitsaasunik tunniussaqarpoq.
Siulersuisut qinerneqaqqittut
Nutaarsiassanik nittartagaq Sermitsiaq.AG 2022-mi quppernertigut 20,5 millioninik alakkaasoqarsimavoq. Aviisit nuna tamakkerlugu saqqummersinneqartartut AG aamma Sermitsiaq (elektroniskimik naqitatullu) amerlassutsimikkut appariaammik annikinnerusumik misigisaqarsimapput.
Tusagassiorfiup Sermitsiaq.AG-p tamatuma saniatigut saqqummersittarpai illoqarfiup aviisia akeqanngitsumik agguaanneqartartoq Nuuk Ugeavis, arnanut atuagassiaq Arnanut kiisalu timmisartuni atuagassiaq Suluk Air Greenland sinnerlugu suliarisarlugu. Tusagassiorfik ilaatigooriarluni atuakkanik saqqummersitsisarpoq.
Ataatsimeersuarnermi siulittaasoq Lars Vesterløkke, siulittaasup tullia Klaus Nygaard aamma Ulla Lynge qinigaaqqipput. Tamatuma saniatigut siulersuisunut ilaasortaavoq sulisut sinniisaat Jette Andersen.