Tusagassiinermut tunngasuni aalajangisartut aalajangerneraq aaqqissuisuunerup nuannaarutigaa
Nittartakkamut Sermitsiaq.AG-mut aamma aviisimut Sermitsiamut aaqqissuisuunerit marluk, Tusagassiinermut tunngasuni aalajangiisartut aalajangernerat kingulleq nuannaarutigaat, tassani Ilisimatusarfik tusagassiorfinnut taakkununnga marlunnut pitsaasumik tusagassiisarnermik malinninngitsutut maalaaruteqarnermini taperserneqanngilaq.
- Tusagassiinermut tunngasuni aalajangiisartut aalajangigaat, Ilisimatusarfiup pitsaasumik tusagassiinerup malinneqannginneranik aamma tusarfinnik isornartorsiuinnginnermik maalaarutaanik tapersiinnginnerat soorunami naammagisimaarpara. Maalaarutit tamarmik itigartitsissutigineqarput, Poul Krarup, Sermitsiami aaqqissuisuuneq oqarpoq.
- Ilisimatuussutsikkut nalunaarusiaq Kalaallit Nunaanni tusagassiuutit ataatsimut isigalugu eqqortumik takutinngikkai isumaqarpunga, ingammik Sermitsiaq. Ilisimatusarnermi periusigineqartoq, ilisimatusarnermi ileqqorissaarneq aamma inerniliussat isornartorsiorpakka, taakku eqqortumik Sermitsiamik takutitsinngillat. Nalunaarusiami tassani tusagassiuutit eqqortumik misissorneqanngillat, ingammillu Sermitsiaq. Taamaattumik Ilisimatusarfiup tunuartittariaqaraa imaluunniit pisariaqartumik eqqaasitsissutilerneqartariaqarpoq aamma ilisimatusarnermi periuserineqartoq killeqarneranik ilisimatitsissuteqarluni, Poul Krarup itisiliivoq.
Christian Schultz-Lorentzenip, AG-mi aamma nittartakkami nutaarsiassaqartitsivimmi Sermitsiaq.AG-mi aaqqissuisuunerup, siulliulluni nalunaarusiamik isornartorsiuisup aalajangiineq aamma nuannaarutigaa.
- Soorunalimi aalajangiineq nuannerlunilu eqqortuuvoq. Tusagassiinermut tunngasuni aalajangiisartut isornartorsiuineq tapersersimasuuppagu, isornartorsiuisutut nutaarsiassaqartitsivittut atuunnissaq ajornarsimassagaluarpoq. Tusagassiuutit pillugit nalunaarusiamik, tusagassiorfiit isornartorsiuinertaqanngitsumik assersuutigalugu nammineq ilanngutassioratik tusagassiuutinik nalunaarutinik aamma allakkanik paasissutissiinernik ingerlatitseqqiinnartarnermik paasititsineq eqqunngilluinnarpoq. Nalunaarusiaq nassuiarnerlutaavoq, tusagassiorfitsinnullu Tusagassiorfik Sermitsiaq.AG-mut innarliissutaasinnaalluni, Christian Schultz-Lorentzen, Tusagassiorfik Sermitsiaq.AG-mi aamma pisortaasoq taama oqarpoq.
Allaaserisamut ilassut amigaataasoq
- Taamaattumik tusagassiorfiup aqutsisuisa kaammattuutigaat, ilisimatusarfiup nalunaarusiaq utertissagaat eqqornerusumillu saqqummersitsillutik. Tamanna pisimanngilaq. Illuanik nalunaarusiamik pingaarnertut allaaserinnittup periuseq pillugu saniatigut allagaqarnissani neriorsuutigaa, piaartumillu nalunaarusiap saqqummersinneqarfiani ilisimatusarfiup nittartagaanut saqqummiunneqarnissaa. Paasisakka naapertorlugit tamanna pinngilaq, naak qaammatit tallimat ingerlareeraluartut. Immaqaana ulapittut, Christian Schultz-Lorentzen oqarpoq.
Schultz-Lorentzenip oqarnera naapertorlugu tusagassiorfik pitsaasumik ilisimatusarfik sivisuumik suleqatigisimavaa:
- Ilisimatuut ilisimasalittut allaaserisatsinni atorusuttartorujussuuagut. Ilisimatusarnermilu angusaat assigiinngitsorpassuit oqaluttuarisarpagut. taanna oqarpoq.
Ilisimatusarfimmilu aqutsisut aalajangiineq pillugu paasissutissiinissaat qilanaaraa.
- Ilisimatusarfiup allaaserisagut Tusagassiinermut tunngasuni aalajangiisartunut tunniukkamigit siammasissumik nalunaarutigineqarput. Ilisimatusarfiup kalaallit ilisimatusarnerannut tunngaillugu oqallisigineqarnerinut sinaakkutit ersarinnerunissaat kissaatigalugit, maalaaruteqarnermini tunngavilersuutigaa. Neriuppunga ilisimatusarfiup aqutsisuisa maanna atuartitsisut aamma ilinniartut taaamatut aalajangertoqarnera paasissutissiissutigissagaat, tusagassiorfiit eqqunngitsuliornerannik pinngitsuutinneqarnerat pillugu.
- Tamatuma saniatigut neriuutigaara, ilisimatusarfiup siulersuisuisa maanna suliaq oqallisigissagaat ilikkagaqarfigalugulu. Ilisimatusarfiummi ilisimatusarnini pillugu ammasumik tusagassiuutini ammasumik oqallisiginninnissaa siunertarineqarpoq., taanna ilanngullugu oqarpoq.
Suliaq asseqanngitsoq
Nunat 25-t missaanniittut immikkut ittunik aalajangiisarfeqarput, kalaallit assigalugit tusagassiorfiit pillugit maalaarutinik suliarinnittartunik. Qallunaat tusagassiinermut tunngasuni aalajangiisartuisa 1999-imili aalajangiiffigisartagaani ujaasinermi sulianik assingusunik nassaassaqanngilaq – tassa universitetit rektorimik siuttulerlugit tusagassiorfiit pillugit maalaaruteqartunik.