Tusaanngap ammasarfii sivitsorneqartut

Tusaangamut ikiortissarsorluni sianerniartarneq juulip pingajuaniit ajornannginnerulissaaq. Ammasarfii ulluinnarni sapaatillu akunnerata naanerani sivitsorneqarput.

Tusaannga 3. julimiit ulluinnarni 9:00-imiit - 22:00-ip tungaanut (ataasinngornermiit sisamanngornerup tungaanut) sapaatip akunmnerata naanerani 16:00-imiit 04:00-ip tungaanut (tallimanngornermiit arfininngornerup tungaanut) sapaammilu 16:00-imiit 22:00-ip tungaanut attavigineqarsinnaavoq.

Oqarasuaatit ullut tamaasa ualikkut sisamaniit unnukkut qulit tungaanut ammasaraluarput.

Naalakkersuisunit kissaatigineqarsimavoq, Tusaanngap nutaanik ammasarfeqalerneratigut sianerniartarneq ajornannginnerulissasoq.

- Neriuppunga kikkut tamarmik ajornartorsiutit pillugit eqqartuinissaminnut pisariaqartitsisut Tusaanngamut sianerusuttassasut. Tusaannga tassaavoq kinaassutsimik isertuussilluni oqarasuaatikkut inersimasunut meeqqanullu ajornartorsiutiminnik eqqartuinissaminnut amigaateqartunut siunnersuisarfik, Isumaginninnermut, Ilaqutariinnermut Inatsisinillu Atuutsitsinermut Naalakkersuisoq Martha Abelsen oqarpoq.

Coronamut ernumassuteqartut aamma sianersinnaasut

Tusaanngamut akeqanngitsumik 801180-imut sianertoqarsinnaavoq imaluunniit 1899-imut SMS-ertoqarsinnaavoq.

Marsimili meeqqat coronavirus pillugu ernumassuteqartut Tusaanngamut ullut tamaasa 8:00-imiit 22:00-ip tungaanut aamma attaveqarsinnaasimapput. Ammasarfiit nutaat aqqutigalugit ammarsarfiit tamakkerneqarput. Ammasarfiit nutaat inersimasunut meeqqanullu atuuppoq, matumani meeqqat coronavirusimut ernumassuteqartut.

Innuttaasunut inersimasuugaluarpata meeraappataluunniit, nalunngisaminnit imaluunniit illoqarfimminni/nunaqarfimminni ikiorserneqarsinnaannginnermik misigisimasunut ajornartorsiumminnik oqaloqatiginninnissamut pisariaqartitsisunut Tusaannga neqeroorutaavoq.

Ukiukkut saaffiginnittoqarnerusartoq

Aamma innuttaasut ajornartorsiutitik pillugit ikiorneqarnissaminnut siunnersorneqarnissaminnullu saaffiginniffissaannut Tusaannga innersuussisinnaavoq.

Tusaannga januaari 2019-imi ammarmalli saaffiginnittut katillugit 2.634-usimapput. Tamanna agguaqatigiissillugu ullormut saaffiginnittut 5-6-iupput, qaammatillu tamaasa saaffiginnittut 164-it missaaniittarlutik.

Ukiukkut taarsiorfiup nalaani saaffiginnittut aasamut naleqqiullugu amerlanerusarput, Namminersorlutik Oqartussat ilisimatitsipput.

Powered by Labrador CMS