Tupilaat tillinneqarsimasut pillugit suliaq unitsinneqartoq
Tupilaat 50-it angerlarsimaffimmi Vigimi Odsherred Kommunemi Sjællandimiittumi, tillinniarnermit tiguneqarsimasut pillugit politiit suliaat unitsinneqarpoq.
Midt- aamma Vestsjællandip Politiivisa suliamik unitsitsinerminni tunngavilersuutigaat tupilaat tillinneqarsimasut pillugit suliami paasissutissanik amigaateqartoqarnera.
- Tillinniap paasineqarnissaanut malitassaqarsimannginneq tunngavilersuutigineqarpoq. Sumiiffimmi tillinniarfiusimasumi misissugassatut tigusat aamma kinguneqarsimanngillat, Midt- aamma Vestsjællandip Politiivini attaveqatigiinnermik suliaqartoq, Camilla Schouw Broholm Sermitsiaq.AG-mut ilisimatitsivoq.
Tupilaat 50-it januaarip naalernerani angerlarsimaffimmi Vigimi Odsherred Kommunemi Sjællandimiittumi tillinneqarersullu, politiinit ujarneqartutut nalunaarutigineqarput.
Politiit Sermitsiaq.AG-mut januaarip 25-ani 2019-imi ilisimatitsipput sumiiffimmi misissugassanik tigusinermit misissuereernermi malitassaqarnissamik neriuuteqarlutik. Tassanili aamma angusaqartoqanngilaq.
Suliaq nutaartaqanngilaq
Midt- aamma Vestsjællandip Politiivi Sermitsiaq.AG-mut ilisimatitsipput innuttaasut saaffiginnittarsimasut akitsorterivimmi tupilaat tuniniarneqartut pillugit. Tupilaalli tuniniarneqartut tilliffigineqartumit pigineqanngillat. Nutaanillu paasisaqartoqartinnagu suliaq tupilannut tillitanut tunngasoq politiinit unitsinneqarallarpoq.
- Suliami paasissutissanik nutaanik pisoqassappat paasiniaaneq nangeqqinneqassaaq, politiilli maannakkuugallartoq malitassaqanngikkallarput, Camilla Schouw Broholm Sermitsiaq.AG-mut ilisimatitsivoq.