Tupilaat 50-it tillinneqartut

Midt- aamma Vestsjællandimi Politiit tupilannik, angerlarsimaffimmi Vigimi, Odsherred Kommunemiittumi, tillinneqarsimasunik ujaasipput.

Midt- aamma Vestsjællandimi Politiit, politiit nittartagaanni taama allapput.

Malitassaqanngillat

Tillinneqartut qaqutigoortut pillugit politiit ujaasillutik nalunaaruteqareernerannit ataaseq kisimi saaffiginnissimavoq, taassuma akitsorterisarfimmi tupilannik tuniniaasoqartoq ilisimatitsissutigisimallugu.

- Tupilannik tillinneqarsimasunik piginnittup akitsorterivimmi tupilaat assigi takuai, oqarlunilu tupilaat tuniniarneqartut taakku nammineq piginagit, Midt- aamma Vestsjællandimi Politiinit, Martin Bjerregaard Sermitsiaq.AG-mut ilisimatitsivoq.

- Suliami politiit malitassaqanngikkallarput pasisaqaratillu.

Tupilaat tillinneqarsimasut Kalaallit Nunaanneersuupput. Piginnittup tupilaat assilisimavai, assillu politiinut tunniussimallugit.

Suli neriuuteqarpoq

Tupilaat tillinneqarsimasut pillugit suliami kinguneqartumik suli saaffigineqanngikkaluarlutik, suliap paasisaqarfiginissaanut politiit suli neriuuteqarput.

Angerlarsimaffimmut tillinniartoqareerneratami kingorna – angerlarsimaffinnut tillinniartoqarsimatillugu tamatigut suliarineqartartumik – sumiiffimmi misissugassanik, tillitat pasisallu pillugit paasisaqarnissaq anguniarlugu, katersisimapput.

- Misissuinerup inerneri suli tigunngilagut, taamaammat suli neriuuteqarpugut, Martin Bjerregaard ilisimatitsivoq.

Midt- aamma Sjællandimi Politiit neriuutigaat innuttaasut tillinniartoqarneranik ilisimasaqartut tupilannilluunniit neqeroorfigitittut Midt- aamma Vestsjællandip Politiivinut saaffiginnissasut, uunga 114.

- Politiit ujaasinerisa kinguneranik neriuutigaarput pisiniartut mianersornerussasut, tuniniaasullu tuniniakkani suminngaanneerunneraanik paasiniaalluarnerussasut. Pisiniarmi tillitanik pisinaveersaartussaavoq, Martin Bjerregaard, Midt- aamma Vestsjællandimi Politiinit oqarpoq.

Tupilaat tillinneqarsimasut assigi una toorlugu takusinnaavatit.