tupaallannartoq
Tunup imartaani qilalugaq qaqortaq naammattoorneqartoq
Pinngortitaleriffimmi ilisimatusartut Tasiilap ungasinngisaani qilalukkamik qaqortamik takugamik tupaallapput
Tunup sineriaata imartaani aasaanerani qilalukkanik qernertanik kisitsisoqarnerani Pinngortitaleriffimmi ilisimatusartut ilimananngilluinnartumik siumugaqarput.
Taakku Kangerlussuup Tasiilallu akornanni qilalukkamik qaqortamik naammattuuipput. Pinngortitaleriffik nittartakkamini taama allappoq.
Atuaruk: Qernertaq marlunnik tuugaalik
Qaqortanik qilalugaqatigiiaaqanngitsoq
Tunup imartaani qilalukkanik qaqortanik naammattuuineq nalinginnaasuunngilaq.
- Tunu qaqortanik qilalugaqarfiunngitsuummat taavani qilalukkanik qaqortanik qaqutigorsuaannaq takunnittoqartarpoq, professor Mads Peter Heide-Jørgensen, aasaq misissueqataasoq oqarpoq.
Atuaruk: Tunumi qilalukkanik kisitseqqinnissaq piareersarneqarpoq
Ukiuni 100-ni tallimat qulillu akornanni
Takunnittarnerit ima akuttutigaat; ukiut 100-t kingulliit ingerlaneranni taamaallaat tallimat qulillu akornanniittut piniartunit, piniariartitaasunit ilisimatusaatigalugulu angalasunit takuneqartarsimallutik.
- Ukiunili kingulliunerusuni Tasiilami Ittoqqortoormiinilu piniartut qilalukkanik qaqortanik siumugaqartalersimapput ukiullu marluk matuma siornagut Ittoqqortoormiini piniartut ilaat qaqortamik ataatsimik qilalugarsimavoq, Mads Peter Heide-Jørgensen oqaluttuarpoq.
Atuaruk: Pinngortitaleriffik: Tunup imartaani qilalukkanik qaqortanik takuit?
'Svalbardimit takornarissat'
Ilisimatusartulli qaqortat qilalugaqatigiiaat Tunumi takussaanerulernissaat ilimaginngilaat, tassami Svalbardimit aqqusaartuinnaammata. Taamaattorli amerliartorniarpasipput.
- Tunumi qilalukkanik qaqortanik akulikinnerusumik takunnittoqartalissappat soorunami ilisimatinneqartarnissarput soqutigisupilussuuarput, tassami amerliartuinnalissagaluarpata pissanganassaqimmat, professori Mads Peter Heide-Jørgensen oqarpoq.