Tunumiut: Kalaallit Nunaanni kitaamiut kangiamiullu saammaasseqatigiittariaqarput

- Saammaasseqatigiittoqassappat Nunatsinni kitaamiut kangiamiullu saammaasseqatigiittariaqarput.

Saammaasseqatigiinnermut Ataatsimiititaliap Tasiilami innuttaasunut paasititsiniaareernermi kingorna tamanna oqariartuutigineqarpoq.

Ataatsimiititaliaq Tasiilami paasititsiniaalluni ataatsimiititsivoq oktobarip qulingiluaanit oktobarip 14-ata tungaanut. Illoqarfimmi suliniutip Nunatta Kangiap soqutiginaateqarnera pissutaalluni Tasiilami taamatut aaqqissuisoqarpoq. Suliniutinik aallartisaanissat aallartinneqarput, kiisalu Saammaasseqatigiinnermut Ataatsimiititaliap Tasiilarmiut misigisimasaat pillugit paasissutissanik katersuipput, Saammaasseqatigiinnissamut Ataatsimiititaliaq tusagassiutinut nalunaaruteqarpoq.

Nammineersinnaassusiiagaasutut misigineq
Paasititsiniaasoqarnerani inuit 40-50-it peqataapput. Qanoq saammaasseqatigiittoqarsinnaanera pillugu inuit eqqarsaataat isumaallu tusaaniarneqarput.

- Kalaallit Nunaanni kitaamiut kangiamiullu saammaasseqatigiinnermik sulissuteqalertariaqartut oqariartuutigineqarpoq. Nunatta kangiamiut kitaamiunit nammineersinnaassusiiagaasutut misigipput. Tunumiut oqaasii kitaamiunit akuersissutigineqarnissaat neriuutigineqarput, paasititsiniaalluni ataatsimiittoqareersoq Saammaasseqatigiinnermut Ataatsimiititaliaq nalunaaruteqarpoq.

Suleriaatsit
Misigisimasat pillugit Saammaasseqatigiinnermut Ataatsimiititaliamit misissorneqaleruttorput, taanna pereerpat saammaasseqatigiittoqarnissaa sulissutigineqalissaaq.

- Tasiilamiinnitsinni paasisarpassuaqarpugut, illoqarfimmilu suliarineqartussamik aallartitsisoqarpoq, ataatsimiititaliami ilaasortaq Ida Mathiassen nalunaarummi oqarpoq.

Nuummi tulliani saammaasseqatigiinnissaq pillugu ataatsimiittoqassaaq 2015-mi. Suut suliarineqarsinnaanersut aallartisarneqassapput. Saammaasseqatigiinnermut Ataatsimiititaliap taanna 2017-ip tungaanut suliarissavaa.

Assit ataani takukkit