Tunumi suliffeqarneq pillugu nutaarsiassatsialak
2021-mi suliffeqarnikkut procentinngorlugu Tasiilami Ittoqqortoormiinilu amerleriarnerpaasoqarpoq. Nanortalimmi, Qaanaami, Uummannami Paamiunilu appariarnerpaasoqarpoq.
Naatsorsueqqissaartarfiup saqqummersitaani nutaami 2021-mi suliffeqarneq naatsorsuiffigineqarpoq. Kisitsisit ilaatigut najukkami suliffeqarneq pillugu aamma angutit arnallu inuussutissarsiornermi assigiinngissutaannik takussutissiivoq.
Siullermilli kisitsit 2021-mi agguaqatigiissillugu inuit 28.910-t qaammammut suliffeqartarsimasut takutippaat.
- Ukiumut sulianut sanilliullugit 441-nik amerlanerupput, qaffariaat 1,5 pct.-iulluni, Naatsorsueqqissaartarfik allappoq.
Suliffeqarnerup annertussusaanik taaneqartartoq 66,5 procentimiippoq, kisitsisillu nunaqavissut 15-it sinnerlugit ukioqartut suliffeqarnerannik takussutissiisuuvoq.
Najugaqarfinni arlalinni ikileriartoqartoq
Saqqummersitaq Tunumit nutaarsiassatsialammik aamma imaqarpoq, najugaqarfinni Ittoqqortoormiini aamma Tasiilami procentinngorlugu suliffeqartut amerleriarnerpaapput, tassa 4,5 procentinik aamma 3,5 procentinik.
Inuit amerleriarnerpaaffiat Nuummi pivoq, tassani inuit suliffeqartut 352-inik amerleriarput. Tassa 3,4 procentinik qaffariarlutik.
Illuanik aamma najugaqarfinni arlalinni suliffillit ikileriarsimapput:
- Najugaqarfinni Nanortalimmi, Qaanaami, Paamiuni Uummannamilu suliffeqarneq 4,4 pct.-inik, 4,0 pct.-inik, 2,9 pct.-inik aammalu 2,8 pct.-inik appariarsimammata. Takussutissiarlu 2 malillugu aamma najugaqarfinni Narsami, Maniitsumi, Kangaatsiami Qasigiannguianilu suliffeqarneq 2,0 pct.-it angullugit angullugit annikinnerulersimavoq, Naatsorsueqqissaartarfik allappoq.
Ataani 2016-mili najugaqarfinni suliffeqarnerup ineriartorneranik takutitsivoq. Takussutissap ataani allaaserisaq nanginneqarpoq.
Pisortaqarfinni ingerlatsinermi kiffartuussinermilu suliffillit amerlanerpaapput, suliffeqartut 45 procentiinik amerlassuseqarlutik.
Inuussutissarsiutinili assigiinngitsumi arnat angutillu amerlassusaat assigiinngissuteqarput.
- Arnat quliugaangata arfinillit pisortaqarfinni ingerlatsinermi kiffartuussinermilu sulisarput. Niuernikkut suliffeqarfiit aamma arnanik suliffigineqarajunnerupput. Angutit akornanni aalisarnermi aalisakkanillu tunisassiornermi niuernermilu kiisalu pisortaqarfinni ingerlatsinermi kiffartuussinerni suliaqarfiit annerpaapput, Naatsorsueqqissaartarfik allappoq.
Ataani takussutissami inuussutissarsiutit assigiinngitsut angutit arnallu agguataarneqarneqarnerannik takussutissiivoq:
