Tunumi qilalukkat qernertat nungutaariaannaasut
Tunumi qilulukkanik qernertanik piniartarneq ingerlaannartumik unitsinneqanngippat, qilalukkat qernertat nungutaariaannaarpput. Atlantikup avannaani miluumasut imarmiut pillugit ataatsimiititaliami NAMMCO-mi ilisimatuut taamatut inerniliipput.
Biologit qilalukkanut qernertanut tunngatillugit immikkut ilisimasaqartut, Tunumi qilalukkat pillugit mianersoqqusipput.
Tuunumi qilalugarfiit pingasunut agguarneqarsimapput, tassaasut Tasiilaq, Kangerlussuaq aamma Ittoqqortoormiit.
Qilalukkat 1.945-niit 246-nut ikileriarsimasut
Biologit Ittoqqortoormiit eqqaanni qilalukkat 2008-mi 1.945-ussangatissimavaat, 2017-imili 246-innanngorsimallutik. Piniartut aamma taamanili qilalukkanik ikilisaaqataasimapput.
NAMMCO-mi Ilisimatuussutsikkut ataatsimiititaliami biologit 2019-imi nutaamik misissuisimanerisa kingorna isumaqartoqarpoq, qilalukkat nungutaanissamut ulorianartorsiormata Tunumi aappaagu qernertanik qilaluarniartoqanngilluinnassasoq.
NAMMCO-mi Ilisimatuussutsikkut aataatsimiititaliap Torhavnimi Savalimmiuniittumi oktobarip 29-aniit novembarip aallaqqaataanut nalunaarusiaani tamanna takuneqarsinnaavoq.
Tusarnaartoqarniarpa?
Apeqqutaavorli Piniarnermut Aaalisarnermulu Naalakkersuisoqarfik ilisimatuussutsikkut siunnersuummut malinninniarnersoq. Biologit ukiorpassuarni ikinneerarsuarneq qilalugartassiisoqarnissaanik inassuteqartaraluartut, naalakkersuisoqarfik naggataatigullu politikkerit tusaajumaneq ajorput ilisimatuussutsikkullu siunnersuutigineqartut sinnerujussuarlugit pisassiissuteqartarlutik. Ilungersunartumik inissisimasoqaraluartoq qilalugartassiissutit ukioq manna 66-iniit 84-inut amerlineqarsimapput.
Naalakkersuisoqarfiup 2020-mi qilalugartassiissutissat pillugit tusarniaassutigisaani takuneqarsinnaavoq, Ittoqqortoormiit 40-nik pisassinneqassasut, Tasiilaq qulinik pisassinneqassasoq Kangerlussuarluni pisassinneqassanngitsoq.
Piujuartitsineq
Ilisimatuut isumaat malillugu sumiiffinni taakkunani pingasuni qilalukkat nungutaariaannaapput. Sumiiffinni taakkunani pineqartuni piujuartitsisumik piniartoqaqqittoqartalernissaata tungaanut piniartarnerup unitsinneqarnissaanik inassuteqarnermut tamanna nassuiaatit ilagaat.
NAMMCO-mi Ilisimatuussutsikkut Ataatsimiititaliap nalunaarusiaa uani atuarneqarsinnaavoq.