Nanoqassuseq

Tunumi nannut kisinneqarnialersut

Pinngortitaleriffimmiut Tunumi nannunik kisitsisinnaanissaq siunertaralugu piareersaatinik suliaqarlutik aallartipput

Nannut nunatta kangianiittut kisinneqarsimanngisaannarput

Nannut nunatta kangianiittut kisinneqarsimanngisaannarput. Taamaakkaluartorli Pinngortitaleriffimmi ilisimatusartartut kisitsisinnaanissaq siunertaralugu piareersaatinik suliaqarlutik aallartereerput.

Siunertaavoq Tunumi nannut pillugit 2019-imi siunnersuinerugallartumik saqqummiussisinnaanissaq.

- Kisitsisinnaanissaq siunertaralugu piareersaanermut aningaasartuutissanut Pinngortitaleriffik Danmarkimi Avatangiisinut Qullersaqarfimmit aningaasaliiffigineqarnikuuvoq. Taamaalilluni ukiortaamiit piniartunik nannunniartartunik Tasiilap Illoqqortoormiillu pigisaaneersunik tusarniaalluni apersuinerit aallartinneqassapput.

- Tusarniaanerni Pinngortitaleriffimmit apersuititaasussanit Tunumi piniartut nannut pillugit ilisimasaannik tamaginnik katersisoqassaaq.

Taama Pinngortitaleriffik tusagassiuutinut nalunaaruteqarpoq.

Atuaruk: Nannut ikiliartortut

Atuaruk: Silap pissusaata allanngoriartornera nannunut sunniuteqanngikkunartoq

Nannut qaammataasanut nassitsissutilerneqassapput
Tasiilap eqqaani nannunut qaammataasanut nassitsissusilersuinissat 2015-ip upernarnerani ilisimatusartartunit Pinngortitaleriffimmeersunit aallartinniarneqarput.

- Nassitsissutit iluaqutsiullugit nannut nikerartarnerat malinnaaffigineqarsinnaalissapput, taamaalilluni nanoqatigiiaat immikkooruteqarnersut paasiniarneqassaaq imaassinnaammammi immikkoortillugit aqutsivigineqarnissaat pisariaqarsinnaasoq, Pinngortitaleriffik allappoq.

Tamatuma saniatigut Pinngortitaleriffiup nannut kingornuttagaasigut 2015-ip ingerlanerani misissuiffiginiarpai, taamaaliornissanilu piniartut Ittoqqortoormiut Tasiilarmiullu misissugassanik katersitinneqartarniarput.

- Misissuinertigut paasiniarneqarpoq nanoqatigiiaat immikkooruteqarnersut, Pinngortitaleriffik allappoq.

Tunumi sumiiffiit nannununik misissuiffiuniartut katillugit million kvadratkilometerinik isorartussuseqartut, tassa Frankrigip Tysklandillu nunataasa katillugit angeqqataat.

Tunu oqaatigineqartarpoq nunarsuaq tamakkerlugu nannut uumaffiisa annersarigaat.

Powered by Labrador CMS