Skip to main content

Tunumi amerlanerusunik qilalugartassiisoqarnissaa Partii Naleqqap piumasaraa

Naalakkersuisut Tasiilamut qulinik qilalukkanik qernertanik ukioq mannamut pisassiisimanera, sumiiffimmi najugaqartunit iluarineqanngilaq. Partii Naleqqap sumiiffimmi immikkoortortaqarfiata qilalukkat pisassat amerlineqarnissaat piumasaraa, sumiiffimmi piniarnikkut allatut isertitaqarnissamik periarfissaqartoqanngimmat.

Ukiumi 2020-mi ullut qulissaanniippugut, ullullu 356-it qaangiuppata aatsaat ukioq naassalluni.

Taamaattoq Naalakkersuisut sumiiffimmut qilalukkanik qernertanik amerlanernik pisassiinissaannik Tasiilami Partii Naleqqap immikkoortortaqarfia piumasaqarpoq, qilalukkat qernertat qulit pisassiissutigineqartut illoqarfimmut 2.000-it missaannik innuttaqartumut naammanngimmata.

- Tasiilami eqqaanilu taavalu Ittoqqortoormiuni pisassanik agguaaneq
kanngunarluinnartumik Naalakkersuisut pisassiinerat akuersaarsinnaanngilluinnarpoq. Paggatassiissutinik tunisineq piniarnermik inuussutissarsiutillit inuuniarnerannut assut
innarliivoq, taakkuuppummi nunatsinni tunitsiveqarfiunngitsut,
pisaminnik inuuniutillit, Partii Naleqqap Tasiilami immikkoortortaqarfiani siulittaasoq, Emanuel Nûko tusagassiutinut nalunaaruteqarluni allappoq.

Qilalukkat qernertat katillugit 40-t

Tasiilami, Ittoqqortoormiini eqqaannilu qilalukkat qernertat katillugit 40-t 2020-imi pisarineqarsinnaasutut Naalakkersuisunit inissinneqarput. Taama pisassiisoqarpoq naak Atlantikup avannaani miluumasut imarmiut pillugit ataatsimiititaliami NAMMCO-mi ilisimatuut Tunumi 2020-mi qilalugarniartoqanngilluinnarnissaanik siunnersuuteqaraluartut.

LÆS OGSÅ: Tunumi qilalukkat qernertat nungutaariaannaasut

Kisitsinerit kingulliit 2017-imi ingerlanneqartut takutippaat tunumi qilalukkat qernertat 246-sut.

Ittoqqortoormiini Tasiilamilu Naalakkersuisut qilalukkanik pisassiinerat misissoraanni takuneqarsinnaavoq Tasiilaq siunissami qilalugartassaqartinneqanngitsoq.

  • Tasiilaq 2021-mi tallimanik qilalukkanik qernertanik pisassinneqassaaq, Ittoqqortoormiit 25-nik pisassinneqarluni.
  • Tasiilaq 2022-mi qilalukkanik qernertanik pisassaqanngilaq, Ittoqqortoormiit 15-inik pisassinneqassalluni.

- Tasiilami eqqaanilu innuttaasut 2.000-it pallippai inuuniarnermikkullu ilungersorput suliffissanik
pilersitsisoqanngimmat inuussutissallu akisullutik. Aalisarnikkut siuarsaasoqanngilaq, piniartut neqissaqartariaqarput, Emanuel Nûko allappoq.

Kisitseqqiinermik piumasaqartoq

Emanuel piumasaqarpoq Tunumi qilalukkat qernertat amerlassusaat kisinneqaqqittariaqartut.

- Piniartut oqariartuuteqarput qilalukkat qernertat amerlangaarmata killilersorneqartariaqanngitsut. Uumassusilerisut piniartunik suleqateqarlutik qilalukkat qernertat takkusimaanerisa nalaanni kisitsiniarlik, ilumut uppernarsarneqarniarli qilalukkat qernertat 246-t sinnerunnersut​​, allappoq.

Piniartut neqissaqartinneqanngippata nioqqutissat akikillineqarnissaat Emanuel Nûkop ilanngullugu piumasaraa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER