Tunuartitseqqittoqartoq: Siunnersuut akerleeriissutaaqisoq aappassaanik tunuartinneqarpoq

Siunnersuutit ilaat allaninngaanniit naammassiuminaatsinneqarnerusinnaapput. Ukiakkut ataatsimiittoqarnerani oqaluuserisassani imm. 130 taakkununnga ilaavoq.

Inatsisartuni ilaasortat ilaqutaasa Inatsisatut ataatsimiinneranni ukiumut marloriarlutik akeqanngitsumik angalatinneqartarnissaannik siunnersuut sisamanngornermi ullaakkut tunuartinneqarsimavoq.

Akeqanngitsumik immikkut angalasoqartarnissaannik siunnersuut politikkerinit suli suliarineqarani aappassaanik oqaluuserisassanit tunuartinneqarpoq.

Tunngavilersuutit assigiinngitsut assigiimmik inerneqartussat

2017-imi siulittaasoqarfik Lars Emil Johansenimik (S) siuttoqarluni siunnersuuteqartuusimavoq. Matumuuna siulittaasoqarfik Kim Kielsenimik (S) siuttoqartoq siunnersuuteqarsimalluni.

Siunnersuut marloriarluni saqqummiunneqarnermigut tamatigut isornartorsiorneqartarsimavoq. 2017-imi siunnersuummut akerliusut atsiornernik katersisimapput, maannakkulli politikkikkut assigiinngitsutigut annertuumik isorineqarluni.

2017-imi Inatsisartuni ilaasortat meeraasa atugaannik pitsaanerulersitsinissaq tunngavilersuutigineqarsimavoq. Matumuuna Inatsisartuni ilaasortat, pingaartumik kisermaajullutik pilersuisuusut sulinerminni pitsaanerusumik avatangiiseqartinneqarnissaat tunngavilersuutigineqarsimalluni.

Kristian Jerimiassen (IA) tusagassiorfitsigut nalunaaruteqarnermi ilisimatitsivoq, Inatsisartuni IA-p gruppianit siunnersuutip tunuartinneqarnissaanik ullaaq manna siulittaasoqarfimmut kaammattuuteqartoqarsimasoq, tassungalu taarsiullugu akeqanngitsumik angalasoqarnerusarnissamik kissaateqartoqarpat allannguutissatut siunnersuummik Inatsisartut siulittaasoqarfiannut 2023-mi upernaakkut tunniussisoqarnissaa kaammattuutigisimallugu.

Tunngavilersuutigineqartut assigiinngikkaluartut assigiimmik inerneqartussaapput. Oqaluuserisassanngortinneqarsimasoq tunuartinneqarsimavoq.