Tunuartipallanneq: Ilisimatooq Nunatsinni digitalikkut qinersisinnaaneq pillugu suliniummit tunuartoq
Kalaallit Nunaanni oqarasuaat angallattagaq qarasaasiarluunniit aqqutigalugu qinersisoqarsinnaaneranik misissuiniarneq taamaatiinnarneqarpoq, ilisimatooq suliniummik aqutsisoq oqarpoq: - Arlaannaannulluunniit attuumassuteqarnanga ilisimatuujunerma innarligassaannginnera taamaalilluni apeqquserneqarpoq, taanna oqarpoq.
Professori Carsten Schürmann Københavnimi IT Universitetetimeersoq oqarasuaat angallattagaq qarasaasiarluunniit aqqutigalugu qinersisoqarsinnaaneranik misissuiniarnermit tunuarpoq. Suliniummi atortorissaarutit sorliit atorlugit Kalaallit Nunaanni isumannaatsumik qinersisoqartarsinnaanersoq misissorneqartussaagaluarpoq, misissuisoqarniarnera ataasinngornermi nittartagaq manna aqqutigalugu saqqummiupparput.
Suliniutigineqarniartorli aallartinneqanngittorluunniit unitsiinnarneqarpoq, ilisimatooq innarligassaannginnerminik ulorianartorsiortinneqartutut misigisimagami.
Carsten Schürmannip ilisimatitsissutigaa, suliffeqarfik namminersortoq suliniuteqaqataasoq suliniummi siunertarineqartoq allamut saatillugu tusagassiorfitsigut nalunaaruteqarsimasoq, tamannalu Carsten Schürmannip akuerisinnaanngilluinnarpaa.
Ilisimatuup oqaatigaa, arlaannaannulluunniit attuumassuteqanngitsumik ilisimatuujunera tassani apeqquserneqarsimasoq. Tusagassiorfitsigut nalunaaruteqartuusimavoq Seier Capital, tassanilu suliffeqarfiup Concordium Blockchainsip suliniummut peqataanissaa pineqarluni.
Isumaqatigiinngissutimineeraq sunniuteqartupilussuaq
Suliniut pillugu aallaqqaammut tusagassiorfitsigut nalunaarummi assersuutigalugu allassimavoq, qinersisoqarnerani, soorlu nunami inatsisartunut qinersisoqarnerani periutsimik aalajangersimasumik "atuisoqarsinnaanersoq" misissuisoqassasoq. Seier Capitalip Concordiummillu tuluttut tusagassiorfitsigut nalunaarutaanni, "atuisoqarsinnaanersoq" allanngortillugu allassimapput "qanoq" atuisoqarsinnaanersoq.
Carsten Schurmannip oqaatigaa, "atuisoqarsinnaanersoq" imaluunniit "qanoq" atuisoqarsinnaanersoq tunngaviatigut assiginngitsupilussuarnik isumaqartut. "Atuisoqarsinnaanersoq" atussagaanni atortorissaarutip atorneqalersinnaanera nalunartarpoq. Akerlianik "qanoq" atuisoqarsinnaanera pineqartillugu aalajangiutereerneqarsimasarpoq, atortorissaasutip atorneqalernissaa.
Isumaqatigiinngissuteerannguaq tamanna sunniuteqartupilussuuvoq, pissutigalugu Concordiumip blockchain atorlugu aaqqiissutissarsiortarnermik inerisaasimasup nipeqartilersimammagu, Concordiumip aaqqiissutiginiagaa kisimi suliniummi atorneqassasoq, professori oqarpoq.
Innarligassaannginnera apeqquserneqarpoq
Carsten Schurmannip erseqqissaassutigaa, misissuiniarnermi teknikkikkut aaqqiissutaasinnaasorpassuit akornanni ataasiinnaap atorsinnaanerata misissorneqarnissaa arlaatigulluunniit siunertaasimanngitsoq:
- Misissuiniarnermi tekonologi aalajangersimasoq kisimi aaqqiissutissatut misissorneqartussatut nassuiaatigineqarnera kukkulluinnartuuvoq. Ajoraluartumik tamanna tusagassiorfiit allaaserisimasaanni kisimi takuneqarsinnaavoq.
- Arlaannaannulluunniit attuumassuteqarnanga ilisimatuujunerma innarligassaannginnera taamaalilluni apeqquserneqarpoq. Taamaammat taamatut siunertaqarluni suliniuteqarnermut peqataasinnaanngilanga. Tamanna tunngavigalugu suliniummit tunuarniarlunga aalajangersimavunga, suliniullu taamatut isikkoqartillugu nassuiarneqarsimasoq ingerlanneqasinnaanani, Carsten Schürmann allakkatigut Sermitsiaq. AG-mut oqarpoq.
Suliffeqarfimmik peqataatitsinani suliniummik misissuiniartoq
Ilisimatuup oqaatigaa, suliniuteqataaniartut akornanni atsioqatigiittoqarsimanngitsoq, taamaammallu suliniutissatut ilusilersorneqarsimasoq atsiorneqarsimanani. Suliniummut aningaasaliissutaasimasut 3,6 millioner koruuniusut suliniummut taamaalillutik atorneqassanngillat.
Carsten Schürmannip ilanngullugu oqaatigaa, Kalaallit Nunaannit taamak pitsaatigisumik aamma sapinngisamik arlaannaannulluunniit attuumassuteqanngitsumik ilisimatusartoqarnissaanik pilersaaruteqartoqarnerata tapersersorneqaarnissaa pingaaruteqarluinnartoq, tamannalu tunngavigalugu Kalaallit Nunaanni oqarasuaat angallattagaq qarasaasiarluunniit aqqutigalugu qinersisoqarsinnaaneranut periarfissanik misissuinissamut suli soqutiginnilluarluni.
Taamaammat tassunga assigusumik aaqqissuussisoqarsinnaanera periarfissaanerarpaa, taamaallaat suliffeqarfinnik teknologimik aalajangersimasumik pilerisaaruteqarnissamik soqutiginnittunik peqataatitsinani.