Skip to main content

Tunngaviusumik isumaqatigiissut tupinnarsigaluttuinnartoq

Kangerlussuarmi inuinnarnut mittarfik pisiarineqarsimava tunineqarsimavaluunniit. Kikkut akiliissappat. Kalaallit danskilluunniit akileraartartut. Nunanut Allanut Naalakkersuisup saqqummiussissummik saqqummiussereermat tamatumunnga akissutissat paasiuminaatsinneqarput.

Tunngaviusumik isumaqatigiissut, Naalakkersuisut illersornissamut ministeri Trine Bramsen peqatigalugu atsioqqammigaat pillugu Karl Frederik Danielsen siulliulluni innuttaasunut eqqunngitsumik paasissutissiivoq, tamatuma kinguneranik Attaveqaatinut Naalakkersuisoq naqqiuteqartariaqarsimavoq nassuiaatigalugulu apeqqummut aappeersimanini naaggaasussaasimagaluartoq.

Tamanna KNR-p pineqartumik samminnilluarsimanerata takutippaa: Paatsuunganersuaqarpoq: Akissuteqarluni aappeerpoq – naaggamilli isumaqarluni

Tusagassiortunik katersortitsinermi Karl Frederik Danielseip erseqqissaatigaa ”Illersornissaqarfiup aserfallatsaaliuineq ulluinnarnilu ingerlatsineq akilissagai”.

Erseqqissaaneq

Tusagassiorfiit tunngaviusumik isumaqatigiissutip sunik imaqarneranik Danielsen nassuiaalluaqqullugu persarilermassuk, illersornissamut ministerip Trine Bramsenip suliamut aamma tunngaviusumik isumaqatigiissummut tunngatillugit qanoq isumaqarnera pillugu Illersornissamut Ministeeriaqarfik erseqqissaasariaqarluni misigilersimavoq:

”Suleqatigiissitat aningaasaqarnermik erseqqinnerusumik misissuisussat pilersinneqarsimapput. Illersornissaqarfiup akisussaaffissani ilisimaarivaa aamma pineqartumut atatillugu, tassunga ilanngullu mittarfiup nutarterneqarnissaanut ingerlateqqinneqarnissaanullu aningaasartuuteqartoqassasoq ilisimavaa”.

Karl Frederik Danielsen pingasunngormat Inatsisartuni apeqqarissaarfigineqarami, illersornissamut ministerip Trine Bramsenip oqaasii tamaasa issuarpai.

Paaseqatigiinneq

Arlaleriarluni oqaatigaa, atorfilittat Kangerlussuarmi Timmisartoqarfimmut tunngatillugu aningaasaqarnermik qulaajaasussat pineqartillugit ”paaseqatigiinneq” matumani pineqartoq.

Danielsenip Inatsisartuni oqaaseqarneerata kingorna ulloq ataaseq qaangiummat Nunanut Allanut Naalakkersuisoq Ane Lone Bagger 2019-mi Nunanut Allanut tunngasutigut naalakkersuinikkut ingerlatsineq pillugu nassuiaammut atatillugu saqqummiussissumik saqqummiivoq.

Ane Lone Bagger allappoq:

- Naalakkersuisut danskillu naalakkersuisuisa tamanna tunngavigalugu Illersornissaqarfiup Kangerlussuarmi mittarfimmiiginnarnissaa aammalu mittarfimmik atuisinnaanissaa, taamatullu mittarfiup timmisartunit innuttaasunut atorneqartartunit nalinginnaasumik atugassarititaasut atuuttut malillugit atorneqaannarnissaa illuatungeriit isumaqatigiissutigaat. Aammattaaq kalaallit mittarfimmik piginnittuunerisa allanngortinneqannginnissaa, isumaqatigiissutigineqarpoq, Illersornissamullu Ministeeriaqarfiup mittarfimmik ingerlatsiissaa paaseqatigiissutigineqarpoq, tassa danskit mittarfik akilissagaat.

Ingerlallugulu akilersussagaat

Oqaatsit kingulliit marluk malugikkit. Illersornissaqarfiup mittarfik ingerlallugulu akilersussavaa. Illersornissaqarfiup sakkutuunut tunngasortai kisiisa akilersussagai pillugu allassimasoqanngilaq.

Aamma Ane Lone Baggerip oqaasii  Trine Bramsenip oqaasiinut, mittarfimmut aserfallassimasumut tunnganerungajattunut akerliulluinnarput:

”Illersornissaqarfiup akisussaaffigiligassani ilisimavai, nalunngilaalu tamanna aningaasartuutissartaqartoq, tamatumunnga ilanngullugu mittarfiup nutarterneqarneranut ingerlateqqinneqarneranullu”.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER