Tunngaviusumik inatsit: Siulittaasoq akissarsiaqaranilu ineqartinneqassanngilaq

Tunngaviusumik inatsisissaq pillugu isumalioqatigiisitaasimasoq aallaqqaammulli assoralisimaarsimavoq, taamanilu siulittaasuusoq Vivian Motzfeldt siulittaasuunerminut atatillugu akissarsiaqarnissaminik aamma atorfilittatut ineqarnissamik piumasaqarmat tamatumunnga pitsaaqutaanngilaq. Piumasaqaat taanna Tunngaviusumik inatsisissaq pillugu isumalioqatigiissitami nutaami tamanna piviusunngortinneqanngilaq.

Tunngaviusumik inatsisissaq pillugu isumalioqatigiissitami ilaasortat Inatsisartunut ilaasortaappata imaluunniit qitiusumik allattoqarfimmi kommunimiluunniit atorfilittaappata ilaasortanut immikkut ittunik akissarsiaqanngilaq. Tunngaviusumik Inatsisissaq pillugu Isumalioqatigiissitap suliassaanut nassuiaatini, Sermitsiaq.AG-p pissarsiarisimasaani tamanna atuarneqarsinnaavoq.

Ineqartitsisoqaranilu akissarsiaqartitsisoqassanngilaq

Siulittaasuusimasup atorfilittatut ineqarnissamik aamma immikkut ittumik akissarsiaqarnissamik piumasaqaataa aamma amerlanerussuteqartunit taperserneqanngilaq.

- Kalaallit Nunaata siunissami tunngaviusumik inatsisissaata pilersinneqarnissaanik suliassamut tunngatillugu, siulittaasup akissarsiaqartinneqarnissaanut apeqqut tunngaviusumik namminermini soqutiginarpallaanngitsoq isumaqarpunga. Kisianni ilumoorpoq, aningaasanut inatsimmi siuliani isumalioqatigiissitamut siulittaasoq immikkut ittumik akissarsiaqartinneqarlunilu atorfilittatut ineqarnermut aningaasartuutinik akiliutsittoqarsinnaaneranut periarfissaliisoqarsimavoq, Vittus Qujaukitsoq Sermitsiaq.AG-mut ilisimatitsivoq. Taaanna Tunngaviusumik inatsisissamut isumalioqatigiissitamut Aningaasaqarnermut Naalakkersuisutut akisussaasuuvoq.

Oqallinneq naleqqutinngitsoq

Vivian Motzfeldtip taamani oqallisissiarisaa taamani naleqqussimanngitsoq, taanna isumaqarpoq, sammineqartoq taassuma oqarneratut ”pingaarnermiitinneqarunnaarnera” pissutigalugu, inatsisissap imarisaanit sallinngorluni.

- Tamanna eqqarsaatigalugu, Tunngaviusumik Inatsisissaq pillugu Isumalioqatigiissitap suliassaanut nassuiaatit nutaat, tunngaviusumik inatsimmik suliaqarneq immikkut artukkiisunngussappat, akissarsiaqartitsinermut inatsit malillugu taamaallaat isumalioqatigiissitami siulittaasup immikkut akissarsiaqartinneqarnissaa siunniunneqarmat naammagisimaarpara. Tunngaviusumik atorfimmut akissarsiaqartitsinissaq naatsorsuutigineqanngilaq, Vittus Qujaukitsoq naqissusiivoq.

Nassuiaat ersarissoq

Tunngaviusumik Inatsisissaq pillugu Isumalioqatigiissitap suliassaanut nassuiaatini, isumalioqatigiissitami kikkut ilaasortaasinnaanerat ersarissumik nassuiarneqarpoq, taamaalilluni ilaasortaq suliap ingerlanerani tunuassappat, inatsisit pillugit nassuiaatit assortuussutaassanngimmata.

Partiit angummik aamma arnamik immikkut innersuussissapput. Naalakkersuisullu inunnik arfineq-marlunnik toqqaassapput, taamaalillunilu naligiissitaanermut inatsit suiaassutsit malillugit agguataarneqarnissaat ataqqineqassammat. Partiit sassartitaat ilaasortanngunngitsoq sinniisuussaaq.

Qinersisoqarnerani kingullermi partiit annersaat – Siumut – siulittaasumik toqqaatinneqassaaq. Siulittaasup tullia IA-mit toqqarneqassaaq, taanna partiit annersaasa tulleraat.

Aalajangeeqataasinnaanatik peqataasut pillugit aamma apeqqut ilaavoq, taakku naalagaaffiup innuttanut pisussaaffinnik nation buildingimulluunniit immikkut ilisimasaqarnissaat naatsorsuutigineqarpoq, suliassat nassuiaataanni tamanna oqaatigineqarpoq.

Naalakkersuisut marlunnit sisamanut ilaasortanik toqqaasinnaanerat tassani aalajangerneqarpoq, minnerpaamik ataaseq naalagaaffiit innuttanut pisussaaffiinik ilisimasaqassaaq.

Tunngaviusumik inatsisissaq pillugu isumalioqatigiissitaq aamma marlunnit sisamanut aalajangersimasunik aalajangeeqataasinnaanatik peqataasunik toqqaanissamut periarfissaqarpoq. Partiillu naalakkersuisoqatigiinnut ilaanngitsut, ataatsimut isigalugu ataatsimik aalajangeeqataasinnaanani peqataasumik toqqaasinnaatitaapput.

Uku akissarsitinneqarsinnaapput

Inatsisartunut qinersisoqarnerani aalajangeeqataasinnaanatik peqataatinneqartut taarserneqassanngillat, kisianni 2017-imi isumalioqatigiissitaasimasup akerlianik Tunngaviusumik inatsisissamut isumalioqatigiissitami ilaasortat Inatsisartunut ilasortaanngitsut imaluunniit Namminersorlutik Oqartussani kommunimilu atorfilittaanngitsut assigalugit akissarsiaqartinneqassapput.

- Isumalioqatigiissitami ilaasortat aamma aalajangeeqataanatik peqataatinneqartut, Inatsisartunut qinikkatut ilaasortaanngitsut imaluunniit atorfilittaanngitsut, inatsisitigut aalajangersakkamik, ulluni isumalioqatigiissitap ataatsimiiffigisaani aamma piareersarfigisaani akissarsitinneqartassapput. Akissarsititsisarneq ullormut 1.350 koruuniuvoq (akileraannginnermi, Vittus Qujaukitsoq ilisimatitsivoq.

Ilisimasalinnit ikiorneqarneq

Isumalioqatigiissitaq siunertamut tunngasumik ilisimasalinnik suliaqartitsisinnaavoq, kisianni aalajangeeqataanatik peqataasut aamma paasisimasallit tunngaviusumik inatsisissamut missingiummut aalajangiinermut peqataannginnissaat aalajangerneqarnikuuvoq.

Powered by Labrador CMS